निकृष्ट रस्त्यामुळे घागबारीजवळ महामार्गावर चक्काजाम
सुरगाणा : प्रतिनिधी
तालुक्यात महिनाभराच्या प्रतीक्षेनंतर जोरदार पावसाने हजेरी लावली असून, सरासरी 100 मिलिमीटर पाऊस झाल्याचा अंदाज आहे. या पावसामुळे नार, पार, तान, मान, अंबिका, गिरणा व कादवा या नद्यांना पूर आला. माणसांसह पशूंच्या पिण्याच्या पाण्याचा प्रश्न मिटला आहे. पावसाअभावी रखडलेल्या भात लावण्यांना आता वेग येणार असल्याने बळीराजा
सुखावला आहे.
पावसामुळे कुठेही जीवितहानी झाली नसली, तरी गुजरात राज्याला जोडणार्‍या नाशिक-सापुतारा महामार्गावरील घागबारी ते सापुतारा सीमेपर्यंत सुरू असलेल्या रस्त्याच्या निकृष्ट आणि रखडलेल्या कामामुळे प्रवाशांचे प्रचंड हाल होत आहेत. नागझरी फाट्याजवळ फरशी पुलाचे काम गेल्या 3-4 महिन्यांपासून खोदून ठेवल्याने प्रशासनाने कच्चा पर्यायी रस्ता दिला होता. मात्र, पहिल्याच पावसात हा तात्पुरता पूल व रस्ता वाहून गेल्याने 5 ते 7 तास वाहतूक पूर्णपणे ठप्प झाली होती.
रस्त्यात मोठमोठी वाहने, शेतकरी, शाळकरी मुले आणि रुग्णवाहिका अडकून पडल्या होत्या. घागबारी, हिरीडपाडा व चिखली गावाजवळ रस्त्यावर चिखल आणि गाळ पसरल्याने दुचाकी घसरून अपघात होत आहेत. प्रशासनाच्या या मनमानी आणि वेळकाढू कारभारामुळे बोरगाव परिसरातील शेतकरी व प्रवाशांमध्ये तीव्र संतापाची लाट पसरली आहे.
पावसाळ्यापूर्वी रस्ता दुरुस्त करावा यासाठी 9 जून 2026 रोजी मार्क्सवादी कम्युनिस्ट पक्षाचे जनार्दन भोये आणि बोरगाव घाटमाथ्यावरील हजारो शेतकर्‍यांनी रास्ता रोकोचा इशारा दिला होता. त्यावेळी तहसील कार्यालयातील बैठकीत अधिकार्‍यांनी एका आठवड्यात पर्यायी डांबरी रस्ता तयार करण्याचे आश्वासन दिले होते. मात्र, प्रशासनाने दिलेल्या आश्वासनाचा विश्वासघात केल्याने आज ही जीवघेणी परिस्थिती उद्भवल्याचा आरोप भोये यांनी केला आहे. येत्या काही तासांत वाहतूक सुरळीत करून पर्यायी रस्ता न दिल्यास संतप्त नागरिक व शेतकरी तीव्र आंदोलन करतील, असा इशाराही त्यांनी दिला आहे.
Rain in Surgana; paddy transplantation begins.