देशभरात सुरक्षित वातावरणात पार पडली ‘नीट’ची फेरपरीक्षा

निगराणीसाठी 1.38 लाख सीसीटीव्ही आणि 51 हजार जॅमर्सचा अभूतपूर्व खडा पहारा

नवी दिल्ली/मुंबई : प्रतिनिधी
नॅशनल टेस्टिंग एजन्सी (एनटीए)द्वारे आयोजित ’नीट-यूजी-2026’ची फेरपरीक्षा रविवारी देशभरात अत्यंत चोख आणि कडक सुरक्षा व्यवस्थेत पार पडली. मागील परीक्षांमधील त्रुटी आणि वाद लक्षात घेता, एनटीएने ही परीक्षा पूर्णपणे निष्पक्ष, पारदर्शी आणि दोषमुक्त करण्यासाठी आतापर्यंतची सर्वांत मोठी आणि अभूतपूर्व सुरक्षा यंत्रणा तैनात केली होती.महाराष्ट्रातून दोन लाख वैद्यकीय प्रवेश इच्छुकांनी या परीक्षेला हजेरी लावली. काही ठिकाणी तपासणी व वेशभूषेवरून किरकोळ वादाच्या घटनांचा अपवाद वगळता संपूर्ण परीक्षा प्रक्रिया सुरळीत पार पाडण्यावर प्रशासनाचा मुख्य भर होता. परीक्षेची गोपनीयता राखण्यासाठी आणि कोणत्याही प्रकारची गैरप्रकार रोखण्यासाठी देशभरातील 5,440 परीक्षा केंद्रांवर व्यापक तांत्रिक पावले उचलण्यात आली होती. संपूर्ण देशातील परीक्षा केंद्रांवर तब्बल 1.38 लाखांपेक्षा जास्त सीसीटीव्ही कॅमेरे लावण्यात आले होते, ज्यांच्या माध्यमातून थेट दिल्लीतील नियंत्रण कक्षातून रिअल-टाइम लक्ष ठेवले जात होते.

एआय आधारित देखरेख यंत्रणेचा वापर

यंदाच्या फेरपरीक्षेचे सर्वांत मोठे वैशिष्ट्य म्हणजे, यात प्रथमच आर्टिफिशियल इंटेलिजन्स (एआय) आधारित अत्याधुनिक देखरेख यंत्रणेचा वापर करण्यात आला. या तंत्रज्ञानामुळे विद्यार्थ्यांची बायोमेट्रिक पडताळणी, चेहर्‍याची ओळख आणि संशयास्पद हालचालींवर बारीक नजर ठेवणे सोपे झाले, ज्यामुळे डमी उमेदवारांच्या प्रवेशाला पूर्णपणे आळा बसला. एनटीएच्या सूत्रांनी दिलेल्या माहितीनुसार, इतक्या मोठ्या प्रमाणावर डिजिटल आणि मानवी सुरक्षा यंत्रणा तैनात केल्यामुळे ही फेरपरीक्षा कोणत्याही मोठ्या गालबोटाविना आणि पारदर्शक पद्धतीने यशस्वीरीत्या पार पडली आहे. लवकरच याचे निकाल जाहीर केले जातील.

Re-examination for NEET conducted across the country in a safe environment.