गोंदे येथे शेततळ्यात बुडून शाळकरी मुलाचा मृत्यू

सिन्नर : प्रतिनिधी
तालुक्यातील गोंदे शिवारात शेततळ्यात बुडून एका शाळकरी मुलाचा मृत्यू झाल्याची घटना घडली. कृष्णा अर्जुन तांबे (15) असे मुलाचे नाव आहे. आपल्या मित्रांसोबत दुपारच्या सुमारास गावातील सोमनाथ येबाजी सोनवणे यांच्या शेततळ्यात पोहण्यासाठी गेला होता. मात्र, पाण्यात बुडून त्याचा मृत्यू झाला. मित्रांनी आरडाओरडा करुन गावातील लोकांना जमा केले. ग्रामस्थांच्या मदतीने अर्जुनला पाण्यातून बाहेर काढून सिन्नर ग्रामीण उपजिल्हा रुग्णालयात दाखल केले. मात्र, डॉक्टरांनी त्यास तपासून मृत घोषित केले. याप्रकरणी संजय निवृत्ती तांबे यांनी नांदुरशिंगोटे दुरक्षेत्रात येत याप्रकरणी माहिती दिल्याने अकस्मात मृत्यूची नोंद करण्यात आली आहे. अधिक तपास सहाय्यक पोलिस उपनिरिक्षक आर. टी. तांदळकर करत आहेत.