जि.प.मध्ये 40 उमेदवारांची अनुकंपा तत्त्वावर नियुक्ती

नाशिक : प्रतिनिधी
जिल्हा परिषद, नाशिक अंतर्गत अनुकंपा तत्त्वावर ज्येष्ठता यादीत प्रतीक्षेत असलेल्या 34 उमेदवारांना गट ड संवर्गात, तर सध्या अनुकंपा तत्वावर कार्यरत असलेल्या गट डमधील पात्र सहा कर्मचार्‍यांना गट क मधील पदावर नियुक्ती देण्यात आली आहे.
अनुकंपा तत्त्वावर कार्यरत असलेल्या कर्मचार्‍यांच्या नियुक्तीसाठी जिल्हा परिषदेच्या मुख्य कार्यकारी अधिकारी आशिमा मित्तल यांच्या प्रमुख उपस्थितीत गुरुवारी (दि.19) जिल्हा परिषदेच्या कै. रावसाहेब थोरात सभागृहात समुपदेशन प्रक्रिया पार पडली.
राज्य शासनाच्या धोरणानुसार जिल्हा परिषद सेवेत कार्यरत असताना मृत पावलेल्या अधिकारी व कर्मचार्‍यांच्या कायदेशीर वारसांना अनुकंपा तत्त्वावर नियुक्ती दिली जाते. मृत्युपश्चात एक वर्षाच्या आत संबंधित कार्यालयामार्फत प्रस्ताव सादर करून वारसाचा समावेश ज्येष्ठता यादीत केला जातो. उपलब्ध रिक्त पदांपैकी 10 टक्के पदे अनुकंपा तत्त्वावर भरली जातात. शैक्षणिक पात्रतेनुसार गट क मधील पद रिक्त नसेल, तर संबंधित उमेदवाराला गट ड मधील पदावर नियुक्ती दिली जाते आणि त्यानंतर पद उपलब्ध झाल्यास गट क पदावर पदोन्नतीही केली जाते.
नाशिक जिल्हा परिषदेत गट ड संवर्गातील एकूण 48 कर्मचार्‍यांची प्रतीक्षा यादी संकेतस्थळावर प्रसिद्ध करण्यात आली होती. यातील पात्र 34 उमेदवारांना समुपदेशन पद्धतीने नियुक्ती देण्यात आली.
उर्वरित उमेदवारांना पुढील रिक्त पदांच्या उपलब्धतेनुसार संधी देण्यात येणार आहे. त्याचप्रमाणे गट ड मधील पात्र 6 कर्मचार्‍यांना गट क मध्ये पदोन्नती देण्यात आली आहे.
चार कर्मचार्‍यांना कनिष्ठ सहायक (लेखा), एका कर्मचा-यास वरिष्ठ सहायक (लेखा), तर एका कर्मचा-यास पर्यवेक्षिका म्हणून नियुक्ती देण्यात आली आहे. या समुपदेशनावेळी उपमुख्य कार्यकारी अधिकारी (सामान्य प्रशासन) रवींद्र परदेशी, मुख्य लेखा व वित्त अधिकारी मारुती मुळे, जिल्हा पशुसंवर्धन अधिकारी डॉ.संजय शिंदे उपस्थित होते. यासाठी सामान्य प्रशासन विभागातील सहायक प्रशासन अधिकारी अनिल गिते. कनिष्ठ प्रशासन अधिकारी राजेद्र येवला, वरिष्ठ सहाय्यक शीतल शिंदे यांनी परिश्रम घेतले.