सोनगिरी गोळीबार प्रकरण; संशयित अटकेत

टोलनाक्यावर मध्यरात्री कारवाई; गोळीबार नेमका कुणी केला याचा तपास सुरू

सिन्नर : प्रतिनिधी
तालुक्यातील सोनगिरी येथील गोळीबार प्रकरणात पोलिसांनी वेगाने हालचाली करत मुख्य संशयित सागर रामनाथ वाघ (29, रा. देशवंडी) याला बुधवारी (दि.29) रात्री उशिरा टोलनाक्यावर सापळा रचून अटक केली. दरम्यान, गोळीबारात दुसर्‍या आरोपीचा सहभाग असल्याची माहिती समोर आल्याने प्रकरणाला नवे वळण मिळाले आहे. पोलीस निरीक्षक भरत जाधव यांच्या मार्गदर्शनाखाली एमआयडीसी पोलीस व स्थानिक गुन्हे शाखेच्या पथकाने संयुक्त कारवाई करत नाशिककडून सिन्नरकडे येणार्‍या कारमधून शिंदे टोलनाक्यावर रात्री सुमारे 11 वाजता वाघ याला ताब्यात घेतले.
या कारवाईत सहाय्यक पोलीस निरीक्षक जितेंद्र पाटील, हवालदार योगेश शिंदे, प्रकाश उंबरकर, उमेश खालकर तसेच स्थानिक गुन्हे शाखेचे उपनिरीक्षक सुदर्शन बोडके व हवालदार कैलास मानकर यांनी सहभाग घेतला.
गुरुवारी सिन्नर न्यायालयात हजर केल्यानंतर वाघ याला दोन दिवसांची पोलीस कोठडी सुनावण्यात आली.
या प्रकरणाचा तपास सुरू असून, गोळीबारामागील नेमके कारण आणि आरोपींची भूमिका स्पष्ट होण्याकडे सर्वांचे लक्ष
लागले आहे.

वाघचीही मारहाणीची तक्रार

अटक आरोपी सागर वाघ यानेदेखील सिन्नर एमआयडीसी पोलीस ठाण्यात फिर्याद देत, ललित बोडके व त्यांच्या साथीदारांनी सोनगिरी येथे बोलावून कोयता व कुर्‍हाडीने मारहाण केल्याचा आरोप केला आहे. या घटनेत त्याच्या डोक्याला गंभीर दुखापत होऊन जबड्याला टाके पडले असून, एक दात तुटल्याचे नमूद करण्यात आले आहे. मारहाणीनंतर बेशुद्ध पडल्याने पुढील घटनांची आठवण नसल्याचेही त्याने
सांगितले आहे.

गोळीबाराबाबत नवा ट्विस्ट

गोळीबारासाठी वापरण्यात आलेले पिस्तूल सागर सूर्यवंशी (रा. कोटमगाव, नाशिक) याच्याकडे असल्याची माहिती समोर आली आहे. सूर्यवंशी हा नाशिकरोड पोलीस ठाण्यातील रेकॉर्डवरील गुन्हेगार असल्याचे पोलिसांनी स्पष्ट केले. स्थानिकांकडून झालेल्या मारहाणीतून वाघला वाचवण्यासाठी सूर्यवंशीने गोळीबार केल्याची शक्यता व्यक्त होत आहे. मात्र, फिर्यादी ललित बोडके यांनी आपल्या तक्रारीत सागर वाघ याच्यावरच गोळीबाराचा आरोप केला आहे. त्यामुळे नेमका गोळीबार कुणी केला, याबाबत संभ्रम कायम असून, पोलिसांकडून सखोल तपास
सुरू आहे.

Songiri firing case; Suspect arrested