कर थकबाकी सातशे कोटींवर

थकबाकीदारांना जप्तीच्या नोटिसा, निवडणूक कामामुळे वसुलीवर परिणाम

नाशिक : प्रतिनिधी
महापालिका प्रशासनाने नव्या आर्थिक वर्षात 270 कोटी वसुलीचे आव्हान दिले आहे. 19 जानेवारीपर्यंत 211 कोटींची वसुली होऊ शकली आहे. चालू व मागील अशी एकूण तब्बल 707 कोटींची थकबाकी वसुलीचे आव्हान महापालिकेसमोर आहे.
महापालिका निवडणुुकीकरिता विविध विभागांतील अधिकारी, कर्मचार्‍यांवर निवडणूक कामाची जबाबदारी देण्यात आली होती. दरम्यान, कर्मचारी निवडणुकीच्या कामात व्यस्त असल्याने याचा मोठा फटका करवसुलीला बसला आहे. मागील थकबाकी सहाशे कोटी, तर चालू 107 अशी एकूण सातशे कोटींची थकबाकी झाली आहे. थकबाकी न भरणार्‍यांना कर विभाग जप्तीच्या नोटिसा धाडणार आहेत.
नाशिक महापालिकेत एकूण सहा लाख 13 हजार मिळकतींची संख्या आहे. परंतु यातील तब्बल सातशे कोटींची थकबाकी पडून आहे. दरम्यान, थकबाकी वसूल करण्यासाठी महापालिकेने जूनपासून शास्तीवर 95 ते 75 टक्क्यांपर्यंत सूट दिली होती. यात प्रारंभी जून ते ऑगस्टदरम्यान वसुली बर्‍यापैकी झाली होती. पण सप्टेंबरच्या मध्यापासून निवडणुकीचे काम सुरू झाले. यासाठी करसंकलन विभागातील अधिकारी-कर्मचार्‍यांवर निवडणुकीची जबाबदारी देण्यात आली. मात्र, यामुळे अभय योजनेकडे मिळकतदारांनी दुर्लक्ष केले. परिणामी थकबाकी ज्या तुलनेने वसूल होण्याची अपेक्षा होती त्याला फटका
बसला आहे.

चालू आर्थिक वर्षात 270 कोटी वसुलीचे उद्दिष्ट होते. आतापर्यंत 211 कोटींची वसुली झाली आहे. करवसुलीसंदर्भात पुढील आठवड्यात बैठक घेतली जाणार आहे. त्यानंतर थकबाकीदारांना नोटिसा बजावल्या जातील.
– अजित निकत, उपायुक्त, कर विभाग, मनपा

Tax arrears at seven hundred crores

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.