शहरात वाहतुक कोंडीची समस्या

कर्णकर्कश हॉर्न , वाहतुकीची कोंडी

रविवार कारंजा ते रेडक्रॉस मार्गावर वाहन चालवणे अवघड
नाशिक : प्रतिनिधी
शहरात स्मार्ट सिटीच्या कामांमुळे ठिकठिकाणी खोदलेल्या रस्त्यांमुळे एकीकडे पायी चालणे अवघड झाले असतानाच , रविवार कारंजा ते रेडक्रॉस या मार्गावर दररोज वाहतूक कोंडी होत आहे . सध्या या भागात विद्युत लाइनचे काम सुरू आहे . रस्त्याच्या कडेला खोदकाम सुरू असतानाच या मार्गावर रस्त्याच्या कडेलाच कार आणि इतर वाहने पार्क केलेली असतात . त्यामुळे दररोज वाहतूक कोंडी होत आहे . काल दुपारी तीनच्या सुमारास मोठी कोंडी झाली होती . त्यातच मार्ग काढण्यासाठी वाहनधारक कर्णकर्कश हाॅर्न वाजवतात . त्यामुळे नागरिक त्रस्त झाले आहेत . रविवार कारंजा ते रेडक्रॉस या मार्गावर सध्या स्मार्ट सिटीअंतर्गत काम सुरू आहे . रस्त्याच्या कडेला खोदकाम केले जात आहे . त्यातच हा एकेरी मार्ग आहे . परंतु , रस्त्याच्या कडेला अनेकजण आपल्या कार तसेच टेम्पो , रिक्षा आणि मोटारसायकली पार्किंग केल्या जात असल्याने रस्ता अरुंद झाला आहे . त्यातच हा एकेरी मार्ग असतानाही विरुद्ध दिशेने येणाऱ्या वाहनधारकांमुळे या वाहतूक कोंडीत भरच पडत आहे . काल कारंजा ते रेडक्रॉसपर्यंत वाहतुकीची मोठी कोंडी झाली होती .

अडकलेले वाहनधारक जोरजोरात कर्णकर्कश हॉर्न वाजवित होते . त्यामुळे नागरिकांमध्ये संतापाची भावना व्यक्त होत होती . त्यातच शहरात वाहतुकीला शिस्त लागावी म्हणून टोईंग कारवाई केली जात असली तरी या भागात मात्र टोईंग कारवाई होत नसल्याने वाहनधारक भररस्त्यातच वाहने पार्किंग करतात . त्यामुळे हा रस्ता अरुंद होऊन वाहनधारकांना या रस्त्यावरून चालणे मुश्कील झाले आहे . शहरात टोईंगची कारवाई केली जात असली तरी महात्मा गांधी रोड , ठक्कर बसस्थानक , सिटी सेंटर मॉल , शरणपूर रोड , कॉलेजरोड या भागापुरतीच ती कारंजा भागात रस्त्याच्या कडेलाच अनेक विक्रेते ठाण मांडून बसतात .

कोंडीत ‘ वन – वे’चे उल्लंघन

रस्ता हा एकेरी वाहतुकीसाठी असतानाही शालिमार मेनरोडवरून येणारे नागरिक रविवार कारंजाला जाण्यासाठी याच रस्त्याचा वापर करत असतात . त्यामुळे प्रचंड मोठ्या प्रमाणात वाहतूक कोंडी होते . अनेक वेळा वाहतूक कोंडी टाळण्यासाठी पोलीस रविवार कारंजाला जाण्यासाठी याच रस्त्याचा वापर करत असल्याचे आढळल्यास कारवाई करतात .

Ashvini Pande

अश्विनी पांडे या 2019 पासून पत्रकारितेत कार्यरत असून, सध्या दैनिक गांवकरीत ऑनलाइन कंटेंट क्रीएटर तसेच उपसंपादक म्हणून कार्यरत आहे. त्यांना राजकीय व सामाजिक, सांस्कृतिक विषयाचे सखोल ज्ञान असून, साहित्य संमेलन, राजकीय सभा, राजकारणातील घडामोडी या विषयावर त्यांनी विपुल लेखन केलेलं आहे. विज्ञान शाखे बरोबरच पत्रकारितेतील पदवी बरोबरच साहित्यातील पदव्यूत्तर पदवी त्यांनी प्राप्त केलेली आहे.पत्रकारितेतील योगदानाबद्दल त्यांना विविध सन्मानही प्राप्त झालेले आहेत.