नांदूर नाका येथील हल्ल्यातील जखमीचा मृत्यू, माजी नगरसेवकाच्या अडचणी वाढणार

नाशिक: प्रतिनिधी

नांदूर नाका येथे माजी नगरसेवक उद्धव निमसे यांच्या कार्यकर्त्यांकडून राहुल धोत्रे यांच्यासह कुटुंबावर झालेल्या हल्ल्यात गंभीर जखमी झालेल्या युवकाचा आज सकाळी उपचार सुरू असताना मृत्यू झाला. त्यामुळे आता या प्रकरणात खुनाचा गुन्हा दाखल होणार आहे. या संदर्भातील एक व्हिडीओ सोशल मीडियावर मोठ्या प्रमाणात व्हायरल झाला होता. त्यात माजी नगरसेवक उद्धव निमसे हे व्हिडिओ मध्ये दिसून आले होते, त्यामुळे त्यांच्यावर देखील गुन्हा दाखल झाला होता. या प्रकरणात काही संशयितांवर गुन्हे दाखल करून त्यांना अटकही करण्यात आली आहे. आता या जखमी तरुणाचा उपचार सुरू असताना आज सकाळी मृत्यू झाला. त्यामुळे गुन्ह्याचे कलमे देखील बदलणार असल्याने उद्धव निमसे यांच्या अडचणी वाढण्याची शक्यता निर्माण झाली आहे.