मखमलाबादला बंगल्यात चोरी; 3 लाखांचा ऐवज, दुचाकी लंपास

आळंदी कॅनॉल परिसरातील घटना

पंचवटी : प्रतिनिधी
मखमलाबाद भागातील सुळेवाडी रोडवरील एका बंगल्यात मध्यरात्रीच्या सुमारास चोरट्यांनी धाडसी चोरी केल्याची घटना उघडकीस आली आहे. घरमालक व त्यांचे कुटुंबीय घरात गाढ झोपेत असताना चोरट्याने तीन लाख 45 हजार रुपये किमतीचे सोन्या-चांदीचे दागिने, रोकड आणि दुचाकी, असा मुद्देमाल लंपास केला. याप्रकरणी म्हसरूळ पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, तानाजी रामचंद्र पिंगळे (वय 61, रा. शिवसृष्टी बंगलो, शहाजी चौक, सुळेवाडी रोड, आळंदी कॅनॉलजवळ, मखमलाबाद) यांनी याप्रकरणी फिर्याद दिली आहे.
पिंगळे आपल्या कुटुंबीयांसह 18 जून रोजी रात्री नेहमीप्रमाणे घरात झोपलेले होते. मध्यरात्री 11.45 ते 19 जून रोजी सकाळी 6 वाजेच्या सुमारास चोरट्याने त्यांच्या बंद घराचा कडी-कोयंडा शिताफीने तोडून आत प्रवेश केला.
कुटुंबीय गाढ झोपेत असल्याचा फायदा उठवत चोरट्याने घरातील सोन्या-चांदीचे दागिने व रोकड असा एकूण तीन लाख 45 हजार रुपयांचा ऐवज चोरला. एवढेच नव्हे, तर जाताना चोरट्याने घराच्या आवारात उभी असलेली हिरो होंडा कंपनीची सीडी डिलक्स मोटारसायकल (एमएच 20- 2037)देखील चोरून नेली.
सकाळी कुटुंबीयांना जाग आली असता, घरात चोरी झाल्याचे त्यांच्या निदर्शनास आले.
त्यांनी तातडीने म्हसरूळ पोलिसांना या घटनेची माहिती दिली.
या घटनेची माहिती मिळताच पोलिसांनी घटनास्थळी धाव घेऊन पंचनामा केला. याप्रकरणी म्हसरूळ पोलीस ठाण्यात गुन्हा दाखल करण्यात आला आहे. पुढील तपास पोलीस उपनिरीक्षक दीपक पठारे करत आहेत.

Theft at a bungalow in Makhmalabad; valuables worth ₹3 lakh and a two-wheeler stolen.