लासलगाव विठ्ठल-रुक्मिणी मंदिर पुजारी खोलीत चोरी

सोने-चांदीच्या दागिन्यांसह रोकड लंपास

लासलगाव : वार्ताहर
लासलगाव शहरातील विद्यानगरमध्ये असलेल्या विठ्ठल-रुक्मिणी मंदिराच्या पाठीमागे पुजारी खोलीत सोमवारी रात्रीच्या सुमारास चोरट्यांनी प्रवेश करत सोने-चांदीचे दागिने तसेच रोकड चोरून नेत पोबारा केला. यासंदर्भात लासलगाव पोलिसांत तक्रार करण्यात आली आहे.
अनेक भाविकांचे श्रद्धास्थान असलेल्या विठ्ठल-रुक्मिणी मंदिरामागे पुजारी खोली काढलेली आहे. यामध्ये भगवान संत व त्यांची पत्नी पूजेकरी म्हणून राहतात. सोमवारी रात्री दोघेही घरात नसताना चोरट्याने घराचे कुलूप तोडून आतमध्ये प्रवेश केला. कपाटातील सोन्याचा ऐवज यामध्ये सोन्याची पोत, कानातील
कर्णफुले, चांदीचे दागिने तसेच 10,000 रुपये चोरून नेले आहेत. मंगळवारी सकाळी ही घटना उघडकीस आली. त्यामुळे परिसरात एकच खळबळ उडाली आहे. सोमवारी रात्री शेकडो भाविकांच्या उपस्थितीत मंदिरामध्ये हनुमान चालीसा पठण कार्यक्रम उत्साहात झाला होता. त्यानंतर रात्रीच्या सुमारास चोरट्यांनी चोरी केल्याने परिसरामध्ये भीतीचे वातावरण निर्माण झाले आहे. लासलगाव पोलिसांना घटनेची माहिती कळताच तातडीने पाहणी करून नाशिक येथील ठसेतज्ज्ञ व श्वानपथकाला पाचारण केले होते. यासंदर्भात अधिक तपास लासलगाव सहाय्यक पोलीस निरीक्षक दीपक पाटील यांच्या मार्गदर्शनाखाली सुरू आहे.

Theft in the priest’s room of Lasalgaon Vitthal-Rukmini temple