बसस्थानक परिसरात चोरट्यांचा डाव, दोन दुकाने फोडली

चॉकलेट, सिगारेटसह सुमारे 83 हजारांचा मुद्देमाल लंपास

सिन्नर : प्रतिनिधी
सिन्नर बसस्थानक परिसरात रविवारी मध्यरात्रीनंतर चोरट्यांनी धुमाकूळ घालत दोन दुकाने फोडल्याने व्यापार्‍यांमध्ये भीतीचे वातावरण पसरले आहे. पंचवटी मोटेल्सच्या प्रवेशद्वाराजवळ असलेली गोंदेश्वरी फुड्स अँड बेव्हरेजेस व साईछत्र पान स्टॉल ही दुकाने चोरट्यांनी लक्ष्य केली. चॉकलेट, सिगारेटसह सुमारे 83 हजारांचा मुद्देमाल लंपास केला.
सिन्नर येथील पंचवटी मोटेल्सच्या प्रवेशद्वारावर माजी नगरसेवक विजय जाधव यांचे गोंदेश्वरी फूड नावाने बेकरी व दुग्धजन्य उत्पादने विक्रीचे दुकान आहे. शेजारीच अनिल लहामगे यांचे साईछत्र पान स्टॉल आहे. रविवारी (दि.14) रात्री साडेअकराच्या सुमारास दोन्ही दुकाने नेहमीप्रमाणे बंद करण्यात आली होती. मात्र, सोमवारी (दि.15) सकाळी साडेसातच्या सुमारास गोंदेश्वरी फुड्सचे व्यवस्थापक पंकज अग्रवाल दुकान उघडण्यासाठी आले असता, शटरचे कुलूप तुटलेले व पट्टी उचकटलेली दिसली. आत पाहणी केली असता दुकानातील चॉकलेट व रोख रक्कम चोरीला गेल्याचे लक्षात आले. शेजारील पान स्टॉलमध्येही असाच प्रकार झाल्याचे उघड झाले.
या चोरीत गोंदेश्वरी फुड्समधून चॉकलेट व इतर वस्तूंसह सुमारे 15 हजार रुपये रोख, तर पान स्टॉलमधून विविध कंपन्यांच्या सिगारेट पाकिटांसह दोन हजार रुपये रोख रक्कम चोरीला गेली आहे. एकूण मिळून सुमारे 83 हजार रुपयांचा मुद्देमाल चोरट्यांनी लंपास केला.
या घटनेची माहिती मिळताच सिन्नर पोलिसांनी घटनास्थळी धाव घेत पंचनामा केला. सीसीटीव्ही कॅमेर्‍यात एक चोरटा दिसत आहे. त्याने तोंड झाकल्याने ओळख पटलेली नाही. नाशिकहून फॉरेन्सिक व श्वानपथकही दाखल झाले.
बसस्थानक परिसरासारख्या वर्दळीच्या भागात घडलेल्या या चोरीमुळे व्यापार्‍यांमध्ये असुरक्षिततेची भावना निर्माण झाली असून, रात्रीची गस्त वाढवण्याची मागणी ग्रामस्थ व व्यापार्‍यांकडून होत आहे.

Thieves plot in bus stand area, two shops broken into

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.