सुदैवाने जीवितहानी टळली
सातपूर : प्रतिनिधी
शिवाजीनगर कार्बन नाका येथे एका रिक्षावर भलेमोठे झाड कोसळून रिक्षाचे मोठे नुकसान झाले. मात्र सुदैवाने रिक्षाचालक व प्रवासी नसल्याने मोठी जीवितहानी टळली.
गेल्या 2-3 दिवसांपासून शहरात मुसळधार पाऊस कोसळत आहे. त्यातच खोदकाम केल्यामुळे झाडांच्या मुळ्या उघड्या पडल्या आहेत. मुळ्या कमजोर झाल्यामुळे झाड कोसळल्याची घटना घडली. शहरातील धोकादायक झाडे पावसाळ्यापूर्वी न काढल्यामुळे अशा घटना वारंवार घडतात. यापूर्यीही सोमेश्वर मंदिराजवळ झाड कोसळून एकाचा तर आयटीआय सिग्नलजवळ देखील रिक्षावर झाड कोसळून दोन जणांचा बळी गेला होता. वारंवार झाड कोसळून बळी जात असताना महापालिका प्रशासन मात्र, फारसे गांभीर्याने घेत नसल्याचे चित्र आहे. सातपूर भागात सकाळपासून पाऊस जोरदार पडत असताना सातपूर शिवाजीनगर कार्बन नाका रोडवर भले मोठे झाड कोसळून रिक्षावर पडले यात रिक्षाचे मोठे नुकसान झाले. सुदैवाने रिक्षा चालक तसेच प्रवाशांना जीवित हानी झाली नाही.
गॅस व जलवाहिनीसाठी सातपूर गंगापूर लिंक रोड खोदण्यात आला. खोदकाम करताना झाडांची मुळं उघडी पडून झाडे कमजोर झाली आहेत. ही झाडे धोकादायक बनली आहेत. ठेकेदार मात्र फक्त झाडांच्या बुंध्याजवळ माती ढकलून आपले काम साध्य करीत आहे.
Tree falls on rickshaw in Karbon Naka area