खोदकामामुळे झाडे कोसळण्याचा वाढला धोका
नाशिक : प्रतिनिधी
शहराच्या विविध भागांत करण्यात आलेल्या खोदकामानंतर झाडांची मुळं उघडी पडली आहेत. परिणामी झाडे कोसळून अपघात होण्याचा धोका निर्माण झाला आहे. गेल्या काही दिवसांत शहराच्या विविध भागांत झाडे कोसळली. सातपूरच्या शिवाजीनगर भागात रिक्षावर झाड कोसळले. सुदैवाने या रिक्षात कुणी नव्हते. त्यामुळे दुर्घटना टळली. मात्र, महापालिकेने यापासून बोध घेऊन धोकादायक झाडे तातडीने तोडण्याची गरज आहे.
गंगापूर रोडच्या कडेला अनेक झाडांची मुळं खोदकामात उघडी पडली आहेत. खोदकामानंतर रस्ते योग्यरीत्या न बुजविल्यामुळे पहिल्याच पावसात वाहने या रस्त्याच्या कडेला फसली होती.
गंगापूर रोडच्या कडेला बेंडकुळेनगरपासून ते बारदान फाट्यापर्यंत अनेक झाडे आहेत. या झाडाच्या कडेलाच युटिलिटीसाठी रस्त्याचे खोदकाम केले. त्यामुळे झाडांची मुळं उघडी पडली आहेत. ही झाडे आगामी काळातील पावसाचे वातावरण लक्षात घेता कोसळू शकतात. या रस्त्यावर वाहनांची नेहमीच गर्दी असते. झाड कोसळल्यास मोठी दुर्घटना घडण्याची शक्यता नाकारता येत नाही.त्यामुळे महापालिकेच्या उद्यान विभागाने तातडीने सर्वेक्षण करून धोकादायक झाडांचे अन्यत्र पुनर्रोपण करणे गरचेेचे आहे. मुंबईला स्कूल व्हॅनवर झाड कोसळण्याची घटना नुकतीच घडली आहे. त्यामुळे नाशिकमध्येदेखील खोदकामात मुळं उघडी पडलेली झाडे तातडीने दुसरीकडे पुनर्रोपण करण्याची गरज आहे.
Tree roots have become a threat to citizens’ lives.