सिडको : प्रतिनिधी
पंचवटी परिसरात 2018 मध्ये घडलेल्या तिहेरी हत्याकांड प्रकरणातील आरोपीला जिल्हा व सत्र न्यायालयाने मरेपर्यंत फाशीची शिक्षा सुनावली. पत्नी, मुलगी आणि नातीला जिवंत जाळून ठार मारल्याप्रकरणी हा निकाल देण्यात आला.
पोलिसांनी दिलेल्या माहितीनुसार, 6 ऑगस्ट 2018 रोजी पहाटे साडेचारच्या सुमारास कालिकानगर, दिंडोरी रोड परिसरातील घरात ही घटना घडली होती. संगीता सुरेश देवरे यांच्यासोबत राहण्याच्या कारणावरून झालेल्या वादातून आरोपी जलालउद्दीन अलीमोहम्मद मलिक ऊर्फ खान साहेब याने धमकी दिली होती. त्यानंतर त्याने पेट्रोलपंपावरून डिझेल आणून घरात झोपलेल्या संगीता देवरे, त्यांची मुलगी प्रीती शेंडगे आणि नऊ महिन्यांची नात सिद्धी यांच्या अंगावर डिझेल टाकून त्यांना जिवंत जाळले. या घटनेत तिघांचाही मृत्यू झाला होता.
याप्रकरणी पंचवटी पोलीस ठाण्यात गुन्हा दाखल करण्यात आला होता. सहाय्यक पोलीस निरीक्षक के. डी. वाघ, व्ही. डी. शार्दूल आणि पोलीस निरीक्षक विजय ढमाळ यांनी तपास करून आरोपीविरोधात दोषारोपपत्र दाखल केले होते.
या खटल्याची सुनावणी जिल्हा व सत्र न्यायालय क्रमांक 4 येथे झाली. न्यायाधीश एस. बी. भंसाळी यांनी साक्षीदारांचे जबाब, पंचनामे आणि परिस्थितीजन्य पुरावे ग्राह्य धरत आरोपीला मरेपर्यंत फाशीची शिक्षा सुनावली. सरकारी पक्षातर्फे अतिरिक्त सरकारी अभियोक्ता लीना चव्हाण आणि अनिल बागले यांनी काम पाहिले.
Triple murder accused sentenced to death