गांजाची वाहतूक करणारे दोघे ताब्यात

स्थानिक गुन्हे शाखा, एमआयडीसी पोलिसांची कारवाई

सिन्नर : प्रतिनिधी
गांजाची विक्री करण्याच्या उद्देशाने अवैधरीत्या वाहतूक करणार्‍या दोघांना स्थानिक गुन्हे शाखा आणि एमआयडीसी पोलिसांच्या पथकाने सापळा रचून नाशिक-पुणे महामार्गावर मोहदरी घाटात वाहनाला ताब्यात घेत अटक केली. त्यांच्याकडून 60 हजार रुपये किमतीचा दोन किलो गांजा व दुचाकी जप्त करण्यात आली.

स्थानिक गुन्हे शाखेचे पोलीस निरीक्षक रवींद्र मगर यांना सोमवारी (दि.26) नाशिक- पुणे महामार्गावर गांजाची अवैधरीत्या वाहतूक होत असल्याची माहिती गुप्त बातमीदारामार्फत मिळाली होती.
नाशिक – पुणे महामार्गावर सिन्नर शहराच्या दिशेने दुचाकीवर दोन जण अवैधरीत्या गांजाची विक्री करण्यासाठी येणार असल्याची माहिती मिळताच पोलीस निरीक्षक मगर यांच्या मार्गदर्शनाखाली सहाय्यक पोलीस निरीक्षक संदेश पवार, कर्मचारी नवनाथ सानप, विनोद टिळे, एमआयडीसी पोलीस ठाण्याचे पोलीस निरीक्षक प्रमोद पाटील, कर्मचारी प्रकाश उंबरकर, रुपेश शिंदे त्यांनी सापळा रचला आणि संशयित अलगद जाळ्यात सापडले.
मस्प्लेंडर मोटरसायकलवर जाणारे अरबाज नासीर पठाण (वय 22, रा. सुकदेवनगर, पाथर्डीगाव, नाशिक) आणि किरण मानप्पा बडगेर (23, रा. पवार हाउस, अंबड, नाशिक) यांंना ताब्यात घेतले.
त्यांच्या ताब्यातून 60 हजार रुपयांचा सुमारे तीन किलो गांजा व स्प्लेंडर मोटारसायकल असा एकूण 90 हजार 200 रुपये किमतीचा मुद्देमाल जप्त करण्यात आला आहे.
हे दोघेही बेकायदेशीररीत्या मानवी मनावर विपरीत परिणाम करणारा गांजा नावाचा अमली पदार्थ कब्जात बाळगून विक्री करण्याचे उद्देशाने वाहतक करताना सापडले. त्यांच्याविरुद्ध एमआयडीसी सिन्नर पोलीस ठाण्यात गुन्हा दाखल करण्यात आला आहे.