सिन्नरमध्ये चोरट्याकडून दोन मोटारसायकल जप्त

पोलिसांची कारवाई : 60 हजारांचा मुद्देमाल हस्तगत, अनेक गुन्ह्यांचा उलगडा

सिन्नर : प्रतिनिधी
तालुक्यात वाढत्या मोटारसायकल चोरी व घरफोडीच्या घटनांना आळा घालण्यासाठी सिन्नर पोलिसांनी कारवाई करत सराईत गुन्हेगाराला अटक केली आहे. आरोपीकडून चोरीचा मोबाइल तसेच दोन मोटारसायकल, असा सुमारे 60 हजार रुपयांचा मुद्देमाल जप्त करण्यात आला.
गोरख बाळू पिंपळे (वय 35, रा. झापवाडी, ता. सिन्नर) असे अटक करण्यात आलेल्या संशयिताचे नाव आहे. पोलीस अधीक्षक बाळासाहेब पाटील, अपर पोलीस अधीक्षक आदित्य मिरखेलकर आणि उपविभागीय पोलीस अधिकारी के. के. पाटील यांच्या मार्गदर्शनाखाली ही कारवाई करण्यात आली. सिन्नर पोलीस ठाण्याचे निरीक्षक हेमंतकुमार भामरे यांनी गुन्हे शोध पथकाला विशेष सूचना दिल्यानंतर ही कारवाई करण्यात आली.
गुप्त माहितीच्या आधारे पोलिसांनी सरदवाडी रोड परिसरात सापळा रचून गोरख पिंपळे याला ताब्यात घेतले. त्याची झडती घेतली असता त्याच्याकडून विनाक्रमांकाची प्लॅटिना मोटारसायकल मिळाली. पुढील चौकशीत चोरीचा रेडमी कंपनीचा मोबाइल फोन तसेच गुन्ह्यात वापरलेली आणखी एक मोटारसायकल जप्त करण्यात आली. या कारवाईमुळे सिन्नर पोलीस ठाण्यात दाखल असलेला मोटारसायकल चोरीचा गुन्हा उघडकीस आला आहे. आरोपीवर यापूर्वी वावी, सिन्नर आणि मनमाड पोलीस ठाण्यांत दरोडा, जबरी चोरी, घरफोडी व मोटारसायकल चोरीचे गुन्हे दाखल असल्याची माहिती पोलिसांनी दिली.
ही कारवाई गुन्हेशोध पथकातील समाधान बोराडे, नितीन डावखर, विनोद टिळे, कृष्णा कोकाटे, आप्पासाहेब काकड आणि प्रशांत सहाणे यांनी केली. पुढील तपास पोलीस हवालदार हेबांडे करीत आहेत.

Two motorcycles seized from thief in Sinnar