शेततळ्यात बुडून दोन चिमुकल्यांचा मृत्यू

मानोरी खुर्दमधील हृदयद्रावक घटना

लासलगाव : वार्ताहर
घराचे बांधकाम सुरू असताना खेळत असलेले दोन अल्पवयीन मजुरांची मुले घरामागील शेततळ्यात पडल्याने बुडून त्यांचा मृत्यू झाल्याची हृदयद्रावक घटना बुधवारी (दि.7) दुपारी अडीच वाजेचा सुमारास निफाड तालुक्यातील मानोरी खुर्द परिसरात घडली.
याबाबत करण तानाजी वावधाने यांनी दिलेल्या खबरीनुसार, मानोरी खुर्द येथील नवनाथ सोपान वावधाने यांच्या मालकीच्या शेतातील गट क्रमांक 148/2 मध्ये नवीन घराचे बांधकाम सुरू आहे. सदर बांधकामासाठी मध्य प्रदेशातील मजूर काम करीत आहेत. बुधवारी दुपारी बांधकामाचे काम सुरू असताना मजुरांची मुले परिसरात खेळत होती. खेळता खेळता अरविंद दिनेश गोरे (वय 11, रा. ठोकबेडा, पो. घुसगाव, ता.राजापूर, जि. बडवणी, मध्य प्रदेश) आणि सनी अजय रावत (वय 10, रा.चमुकनाज, ता.गुनावर, जि.पन्ना, मध्यप्रदेश) हे दोघे घराच्या मागील शेततळ्यात जाऊन पडले. पाण्यात बुडाल्याने त्यांच्या नाकातोंडात पाणी गेले. कुटुंबीय व घरमालकाच्या ही घटना लक्षात येताच त्यांना तातडीने शेततळ्यातून बाहेर काढून उपचारासाठी लासलगाव येथील ग्रामीण रुग्णालयात आणण्यात आले. मात्र, ग्रामीण रुग्णालयातील वैद्यकीय अधिकारी डॉ.बाळकृष्ण अहिरे यांनी तपासणीनंतर दोन्ही मुलांना मृत घोषित केले. घटनेची माहिती मिळताच लासलगावचे सहायक पोलीस निरीक्षक सागर कोते, हवालदार संदीप शिंदे तसेच औदुंबर मुरडनर, अरुण डोंगरे यांनी घटनास्थळी भेट देऊन पाहणी केली. हवालदार संदीप शिंदे तपास करीत आहेत.

Two young children drown in a farm pond.