गुप्त पद्धतीच्या मतदानामुळे धास्ती कायम
नाशिक : प्रतिनिधी
नाशिक विधान परिषदेसाठी आज, गुरुवारी (दि.18) मतदान प्रक्रिया पार पडणार आहे. या निवडणुकीचे वैशिष्ट्य म्हणजे, महायुतीचे उमेदवार असलेले नरेंद्र दराडे यांच्यासमोरील अपक्ष उमेदवार गोकुळ गिते यांनी गेल्या आठवड्यातच प्रचार थांबवण्याचा निर्णय झाला. मात्र, तरीही शिंदेसेनेत अस्वस्थता असून, त्या भीतीतूनच नाशिकमधून महायुतीच्या मतदारांना ठाण्याला हलवण्यात आले आहे. एकूण 619 मतदार मतदानाचा हक्क बजावणार आहेत.
विधान परिषद निवडणुकीच्या रणांगणातून अपक्ष उमेदवार गोकुळ गिते यांनी याआधीच प्रचार थांबवला. गिते यांनी माघार घ्यावी, याकरिता महायुतीचे मंत्री गिरीश महाजन, उदय सामंत यांनी नाशकात तळ ठोकत गिते यांची माघारी करून घेतली. यानंतर दराडेंसमोरील आव्हान संपुष्टात येईल अशी चर्चा होती, पण गिते यांनी फक्त माघार घेतली. समर्थन न दिल्याने शिंदेसेनेने कुठलाही दगाफटका नको म्हणून महायुतीच्या मतदारांना थेट ठाण्याला नेण्यात आले.
दरम्यान, गिते उघडपणे कुठेही प्रचार करताना दिसत नसून त्यांनी प्रचार थांबवला आहे. मात्र, असे असतानाही शिंदेसेनेच्या नेत्यांकडून काळजी घेतली जात असल्याचे बोलले जात आहे.
गोपनीय पद्धतीमुळे चलबिचल
विधान परिषद निवडणुकीसाठी भाजपने आपल्या नगरसेवकांना पक्षादेश (व्हीप) देत शिंदेसेनेच्या उमेदवाराला मतदान करण्याचे निर्देश दिले आहेत. याचप्रमाणे शिंदेसेनेने स्वपक्षाच्या नगरसेवकांना आणि राष्ट्रवादी काँग्रेसने आपल्या मतदारांना महायुतीला मतदान करण्याच्या सूचना आधीच केल्या आहेत. मात्र, सदरची मतदानप्रक्रिया गोपनीय असल्याने मतदारच ठरवेल की तो कोणासाठी मतदान करेल. यामुळे शिंदेसेनेत चलबिचल असल्याचे समजते आहे.
उपमुख्यमंत्री एकनाथ शिंदे यांची प्रतिष्ठा पणाला
नाशिक विधान परिषदेची जागा उपमुख्यमंत्री एकनाथ शिंदे यांच्यासाठी प्रतिष्ठेची बनली आहे. गोकुळ गिते यांच्या माघारीची जबाबदारी त्यांनी मंत्री उदय सामंत यांच्यावर सोपवली होती. याशिवाय शिंदे यांनी गिते यांच्याशी स्वत: चर्चा केल्याचे सांगण्यात आले. नाशिक लोकसभेत पराभव झाल्यानंतर शिंदेसेनेला विधान परिषदेत कुठलाही दगाफटका नको आहे, याकरिता कमालीची खबरदारी घेतल्याचे दिसते.
Voting for the Nashik Legislative Council today.