मनपाचा निर्णय; ऑगस्टमध्ये दोन दिवसांआड पाणी
नाशिक : प्रतिनिधी
अल निनो परिस्थितीच्या पार्श्वभूमीवर संभाव्य पाणीटंचाईला तोंड देण्यासाठी नाशिक महापालिकेने दर शनिवारी पाणीपुरवठा बंद करण्याचा निर्णय घेतला आहे. याद्वारे प्रशासनाने पाणीकपातीचा निर्णय घेतला आहे. जूनचा दुसरा आठवडा उलटूनही शहराकडे पावसाने पाठ फिरवल्याने भविष्यातील पाणी टंचाईचा सामना करण्यासाठी महापालिका प्रशासनाने हा निर्णय घेतला आहे.
दरम्यान महापालिका प्रशासनाने म्हटले की, भारतीय हवामान विभागाने व्यक्त केलेल्या अंदाजानुसार यावर्षी अल निनो परीस्थितीचा प्रभाव राहण्याची शक्यता आहे. त्यामुळे पर्जन्यमानात घट होण्याची शक्यता नाकारता येत नाही. राज्यातील विविध धरणेस जलाशय व इतर जलस्रोेतांमधील उपलब्ध पाणीसाठ्याचा विचार करता पिण्याच्या पाण्याचा गरजांना
सर्वोच्य प्राधान्य देण्याच्या सूचना दिल्या आहेत. भविष्यात पिण्याच्या पाण्याची टंचाई निर्माण होऊ नये यासाठी तातडीने प्रतिबंधात्मक उपाय योजना करणे आवश्यक असल्याबाबत निर्देश देण्यात आलेले आहे.
शहराला पाणीपुरवठा करण्यासाठी सर्वसाधारणपणे सरासरी दररोज 600 द.ल.लि. प्रतिदिन इतके कच्चे पाणी गंगापूर धरण समूह व मुकणे धरण येथून उचलले जाते. सात ठिकाणी असलेल्या जलशुद्धीकरण केंद्रांत शुद्धीकरण करून 134 जलकुंभांद्वारे व सुमारे 2502 किलोमीटर लांबीच्या जलवाहिन्यांमधून शहरात पाणी वितरित केले जाते. सध्या एकूण आरक्षण 6400 पैकी आतापर्यंत 5133.99 पाणीवापर झाला आहे. शिल्लक पाणीसाठा 1266.01 आहे. शिल्लक पाणीसाठा 60 दिवस पुरेल इतका शिल्लक आहे. त्यात 18 दिवसांची तूट येत आहे. त्यानुसार जूनमधील दोन शनिवार, जुलैतील चार शनिवार व ऑगस्ट महिन्यात दोन दिवसांआड पाणीकपात करणे अनिवार्य असल्याने त्याचे नियोजन केले आहे.
यानुसार असेल नियोजन
जुन व जुलै महिन्यातील प्रत्येक शनिवारी पाणीपुरवठा होणार नाही. ऑगस्ट महिन्यात दोन दिवसांआड म्हणजेच 1, 4, 7, 10, 13, 16, 19, 22, 25, 28 व 31 ऑगस्ट या दिवशी पाणीपुरवठा होणार नाही. ही माहिती पाणीपुरवठा विभागाचे अधीक्षक अभियंता रवींद्र धारणकर यांनी दिली.
Water supply in Nashik to remain shut every Saturday from now on!