चोरी करणार्‍या महिला पोलिसांच्या ताब्यात

चोरीच्या इराद्याने प्रवास; निफाड बसस्थानकात कारवाई

निफाड ः विशेष प्रतिनिधी
येवला ते नाशिक बसमधून पाच ते सहा संशयित महिला (वय अंदाजे 35 ते 40) आपल्या लहान बाळांना सोबत घेऊन चोरीच्या उद्देशाने निफाडकडे येत असल्याची खबर्‍यामार्फत निफाड पोलिसांना माहिती मिळाली. पोलिस निरीक्षक गणेश गुरव यांच्या मार्गदर्शनाखाली पोलिसांनी निफाड बसस्थानकात सापळा लावला.
नाशिकला जाणारी बस शनिवारी (दि. 7) सकाळी अकराच्या सुमारास निफाड बसस्थानकात आली. बसमधील संशयित महिलांची कसून चौकशी केली. महिलांनी उडवाउडवीची उत्तरे दिल्याने संबंधित महिला निफाड पोलिसांच्या जाळ्यात सापडल्या. संशयित महिलांनी 24 मे रोजी नाशिक ते छत्रपती संभाजीनगर बसने प्रवास करत असताना औरंगाबाद नाका ते चांदोरी चौफुलीदरम्यान दुपारी 2 ते 3 च्या सुमारास येवला येथील फिर्यादी महिलेच्या बॅगमधून सोन्याचे गंठण, पोत असे अंदाजे 60 हजारांचे सोने लंपास केले होते. याबाबत सायखेडा पोलिसांत गुन्हा दाखल झाला होता. संशयित महिलांनी मालेगाव ते अहिल्यानगर प्रवासादरम्यान 19 एप्रिलला सावरगाव शिवार (ता.येवला) येथे एक लाख 50 हजारांची तीन तोळे सोन्याची पोत व दहा हजारांचे दहा भार चांदीच्या ब्रेसलेटची चोरी केली होती. या घटनेची नोंद येवला शहर पोलिस ठाण्यात झाली होती. सायखेडा व येवला येथील या फिर्यादी महिलांना निफाड पोलिस ठाण्यात बोलावण्यात आले. फिर्यादी महिलांनी संशयित महिलांना ओळखले. याच महिलांनी सोन्याची चोरी केल्याची कबुली दिली. त्यांचा जबाब नोंदवून कारवाईसाठी सायखेडा व येवला पोलिस ठाण्याच्या ताब्यात दिले. कारवाईत पोलिस कपालेश्वर ढिकले, नितीन साळवे, धनंजय जाधव, नितीन सांगळे, संगीता जाधव, पूनम शिंदे, राजेंद्र दरोडे यांनी सहभाग घेतला.

कोणत्याही प्रवासादरम्यान सावध राहूनच प्रवास करायला हवा. आपले मौल्यवान दागिने प्रवासात घालणे टाळावे. प्रवासात आपल्या मागे व पुढे, शेजारी कोण बसलेले आहे, याचा अंदाज घ्यावा. गर्दीच्या ठिकाणी नागरिक व महिलांनी मोबाईल, पैशाच्या पाकिटाची काळजी घेतली पाहिजे. जर कुणाला एखाद्या व्यक्तीच्या संशयास्पद हालचाली वाटल्या तर 112 या नंबरवर फोन करून माहिती दिली पाहिजे किंवा जवळच्या पोलिस ठाण्यात संपर्क केला पाहिजे.
– गणेश गुरव, पोलिस निरीक्षक, निफाड पोलिस ठाणे