महिला आरक्षणाची मंगळवारी सोडत

नाशिक : प्रतिनिधी
नाशिक महानगरपालिकेच्या निवडणुकीसाठी मंगळवारी ( दि . ३१ ) सकाळी साडेदहा वाजता महिला राखीव जागांसाठी प्रभागनिहाय आरक्षण सोडत काढण्यात येणार आहे . विशेष म्हणजे ऑन कॅमेरा ही सोडत होणार असून , महापालिका प्रशासनाकडून यासंबंधीची सर्व तयारी सुरू आहे . यासाठी दादासाहेब गायकवाड सभागृह आरक्षित करण्यात आले आहे . अनुसूचित जाती ( महिला ) , अनुसूचित जमाती ( महिला ) आणि सर्वसाधारण ( महिला ) अशा तीन संवर्गासाठी चिठ्ठी पद्धतीने आरक्षण काढले जाणार आहे .

नाशिक महापालिकेतील एकूण जागेच्या पन्नास टक्के महिला राखीव जागांसाठी येत्या ३१ मे रोजी अनुसूचित जाती ( महिला ) , अनुसूचित जमाती ( महिला ) व सर्वसाधारण महिला जागा निश्चितीकरिता प्रभागनिहाय आरक्षण सोडत काढली जाणार आहे . सर्वोच्च न्यायालयाने राज्य आयोगाला ३१ मे रोजी होणाऱ्या आरक्षण सोडतीत १३३ जागांमधून ६७ जांगावर महिलांसाठी आरक्षण काढण्यात येणार असल्याने आता साऱ्यांच्या नजरा महिला आरक्षणाकडे लागल्या आहेत . महिला आरक्षण निघाल्यास अनेकांचे पत्ते कट होण्याचे तर काहींचे भाग्य उजळणार आहे . त्यामुळे चिठ्ठीच अनेकांचे राजकीय भविष्य ठरविणार आहे . चिठ्ठी पद्धतीने हे आरक्षण काढण्यात येणार असल्याने त्यासाठी शालेय विद्यार्थ्याचा शोधही घेतला जात आहे . त्याची जबाबदारी शिक्षण विभागावर सोपविण्यात आली असून , आरक्षण सोडतीच्या दरम्यान वाद होण्याची शक्यता गृहीत धरून सोडतप्रसंगी पोलीस बंदोबस्त मिळण्यासाठी पत्र देण्यात आले आहे . निवडणूक घेण्याची सूचना केल्याने न्यायालयाच्या या निर्देशांनंतर १४ मे रोजी राज्य निवडणूक आयोगाने नाशिक महापालिकेची अंतिम प्रभागरचना जाहीर केली . निवडणुकीसंदर्भातली सर्व प्रक्रिया पार पाडून पुढच्या तीन – चार महिन्यांत निवडणूक होण्याची शक्यता आहे . स्थानिक स्वराज्य संस्थांच्या निवडणुकीत पन्नास टक्के महिला आरक्षण याप्रमाणे नाशिक महापालिकेत ६७ जागा महिलांच्या ताब्यात जाणार असून , ४३ प्रभागांत प्रत्येकी एक आणि एका प्रभागात दोन याप्रमाणे ४५ महिलांचे आरक्षण असेल तर उर्वरित २२ जागांच्या आरक्षणाची सोडत पद्धतीने काढण्यात येणार असून , यामध्ये एससी , एसटी आणि सर्वसाधारण जागांचा समावेश असेल . भाभानगर येथील दादासाहेब गायकवाड सभागृहात आरक्षणाची सोडत होणार असल्याने मनपाने मुंबई नाका पोलीस ठाण्याला बंदोबस्तासाठी पत्र दिले आहे .

हेही वाचा : सातपूरला अस्वच्छता पाहून मनपा आयुक्तांचा चढला पारा

नाशिक महापालिकेची मुदत मार्च महिन्यातच संपुष्टात आली असली तरी ओबीसी आरक्षणाच्या मुद्यावरून ती पुढे ढकलण्यात आली . त्यामुळे निवडणुकीच्या तयारीत असलेल्यांना धक्का बसला होता . आता मात्र या आरक्षण सोडतीसाठी यंदा कालिदास कलामंदिरऐवजी दादासाहेब गायकवाड सभागृहाची निवड करण्यात आली आहे .

हेही वाचा : शहरात पाण्याची गरज वाढली दररोज 5 दक्षलक्ष लिटर पाण्याची वाढ

Ashvini Pande

अश्विनी पांडे या 2019 पासून पत्रकारितेत कार्यरत असून, सध्या दैनिक गांवकरीत ऑनलाइन कंटेंट क्रीएटर तसेच उपसंपादक म्हणून कार्यरत आहे. त्यांना राजकीय व सामाजिक, सांस्कृतिक विषयाचे सखोल ज्ञान असून, साहित्य संमेलन, राजकीय सभा, राजकारणातील घडामोडी या विषयावर त्यांनी विपुल लेखन केलेलं आहे. विज्ञान शाखे बरोबरच पत्रकारितेतील पदवी बरोबरच साहित्यातील पदव्यूत्तर पदवी त्यांनी प्राप्त केलेली आहे.पत्रकारितेतील योगदानाबद्दल त्यांना विविध सन्मानही प्राप्त झालेले आहेत.