पंचवटीत तरुणाचा पूर्ववैमनस्यातून खून

काका-पुतण्याला अटक

पंचवटी : प्रतिनिधी
पेठरोडवरील अश्वमेधनगरमध्ये शनिवारी रात्री पूर्ववैमनस्यातून रवी संजय उशिले (वय 23, रा. सप्तरंग सोसायटीच्या मागे, हरिहरनगर, पेठ रोड) याचा खून करण्यात आला. याप्रकरणी दोघा हल्लेखोरांना अवघ्या दोन तासांत मुंबई महामार्गावरील विल्होळी येथून ताब्यात घेतले आहे. दोघे आरोपी काका-पुतणे आहेत. महापालिका निवडणुकीची रणधुमाळी सुरू असताना झालेल्या या जीवघेण्या हल्ल्यामुळे परिसरात तणाव निर्माण झाला होता.
पोलिसांनी दिलेल्या माहितीनुसार, शनिवारी रात्री 11.30 वाजता पेठरोडवरील अश्वमेधनगरमध्ये ही घटना घडली. रात्रीच्या जेवणानंतर वॉक करून घरी परतत असताना समाधान बंडू गोर्‍हे व रवी उशिले गप्पा मारत होते. यावेळी गल्लीतच राहणारे रवी याच्यावर ओम गवळी याने चॉपरने व आरोपी संतोष गवळी याने लाकडी दांडक्याने हल्ला चढवला. या हल्ल्यात पाठीवर, पोटावर तसेच डोक्यावर वार करण्यात आला. यात वर्मी घाव बसल्याने रवीचा मृत्यू झाला.
या घटनेची माहिती मिळताच सहायक आयुक्त शेखर देशमुख, म्हसरूळ पोलीस ठाण्याचे वरिष्ठ निरीक्षक अंकुश चिंतामण यांनी अधिकारी व कर्मचार्‍यांसह घटनास्थळी धाव घेतली. प्रत्यक्षदर्शींनी दिलेल्या माहितीनुसार, आरटीओ आॉफिसजवळील गजवक्रनगरमध्ये राहणारे ओम व संतोष गवळी यांनी हा हल्ला चढवल्याची माहिती मिळाली. त्यानुसार पोलीस पथकाला त्यांच्या मागावर पाठवले. तांत्रिक विश्लेषण तसेच मानवी कौशल्याचा वापर करून दोघा आरोपींना विल्होळी येथून ताब्यात घेण्यात आले. त्यांच्याविरुद्ध खुनाचा गुन्हा नोंदवला आहे. दोघांना न्यायालयात हजर केले असता 8 जानेवारीपर्यंत पोलीस कोठडी सुनावण्यात आली आहे.

मुलीवरून झाला होता वाद

यातील ओम हा संतोष याचा पुतण्या असून, रवी याच्याशी यापूर्वी मुलीच्या प्रकरणावरून वाद झाला होता. मात्र, त्यानंतर रवी त्या परिसरातील कामावरून काढले होते. शनिवारी रात्री रवी पुन्हा गल्लीत आल्याचे समजताच ओम हा काकाला घेऊन पोहोचला. तिथे झालेल्या बाचाबाचीनंतर हल्ला चढवण्यात आला. मृत रवीच्या पश्चात आई असून, ती धुणीभांडी करून पोट भरते. तिच्या आयुष्याचा आधार गेल्याने परिसरात हळहळ व्यक्त होत होती.

Youth murdered in Panchavati due to past enmity