गेम खेळण्यास मोबाईल न दिल्याने 12 वर्षीय मुलाची आत्महत्या

निफाड:

आईने गेम खेळण्यासाठी मोबाइल दिला नाही या कारणाने नैताळे येथील ऋषिकेश जालिंदर सुरासे या इयत्ता 6 वी मध्ये शिकणाऱ्या 12 वर्षाच्या मुलाने घरात आत्महत्या केल्याची घटना उघडकीस आली आहे . या बाबत अधिक माहिती अशी की , नैताळे येथील आदिवासी वस्तीमध्ये जालिंदर सुरासे व पत्नी भारती सुरासे आपल्या दोन मुलांसमावेत राहतात . ते मोलमजुरी करून कुटुंबाचे पालन पोषण करतात त्यांचा एक मुलगा इयत्ता सहावी तर दुसरा इयत्ता तिसरीत प्राथमिक विद्यामंदिर नैताळे या नाशिक जिल्हा परिषदेच्या शाळेत शिकतो . त्यातील इयत्ता 6 वी मध्ये शिकत असलेला 12 वर्ष वयाच्या ऋषिकेशने आई भारती यांच्याकडे गेम खेळण्यासाठी मोबाइल मागितला .मात्र मोबाइल न देता अभ्यास कर असे सांगितले. त्यानंतर त्या बाजारात गेल्या . मात्र त्या घरी आल्या तेव्हा त्यांना ऋषिकेश ओढणीच्या सहाय्याने लटकलेल्या अवस्थेत दिसला . घटनेची माहिती कुटुंबाने निफाड पोलिसांना दिली . पोलिसानी पंचनामा करुन आकस्मिक मृत्यूची नोंद केली . निफाड येथे विच्छेदनानंतर ऋषिकेशचा मृतदेह कुटुंबीयांच्या ताब्यात दिला . पुढील तपास पोलीस निरीक्षक रंगराव सानप यांच्या मार्गदर्शनाखाली हवालदार देशमुख करीत आहेत .

Ashvini Pande

अश्विनी पांडे या 2019 पासून पत्रकारितेत कार्यरत असून, सध्या दैनिक गांवकरीत ऑनलाइन कंटेंट क्रीएटर तसेच उपसंपादक म्हणून कार्यरत आहे. त्यांना राजकीय व सामाजिक, सांस्कृतिक विषयाचे सखोल ज्ञान असून, साहित्य संमेलन, राजकीय सभा, राजकारणातील घडामोडी या विषयावर त्यांनी विपुल लेखन केलेलं आहे. विज्ञान शाखे बरोबरच पत्रकारितेतील पदवी बरोबरच साहित्यातील पदव्यूत्तर पदवी त्यांनी प्राप्त केलेली आहे.पत्रकारितेतील योगदानाबद्दल त्यांना विविध सन्मानही प्राप्त झालेले आहेत.