पहिल्याच दिवशी चार लाखांहून अधिक बालकांचे लसीकरण
नाशिक : प्रतिनिधी
राष्ट्रीय पल्स पोलिओ लसीकरण मोहिमेच्या अंतर्गत काल (दि. 28) नाशिक जिल्ह्यात 0 ते 5 वयोगटातील बालकांसाठी व्यापक प्रमाणावर लसीकरण मोहीम राबविण्यात आली. संपूर्ण नाशिक जिल्ह्यामध्ये पहिल्याच दिवशी 88.2 टक्के लसीकरणाचे उद्दिष्ट यशस्वीरीत्या पूर्ण करण्यात आले आहे. जिल्ह्यतील एकूण लोकसंख्येचा विचार करता, मोहिमेसाठी 4,75,592 बालकांचे अपेक्षित उद्दिष्ट निश्चित करण्यात आले होते. यापैकी 88.2 टक्के बालकांना पहिल्याच दिवशी पोलिओ प्रतिबंधक लस पाजण्यात आली. मोहिमेच्या अचूक आणि सुव्यवस्थित नियोजनासाठी तालुक्यात एकूण 4,107 लसीकरण बूथ तयार करण्यात आले होते.
मुख्य बूथव्यतिरिक्त दुर्गम भाग, शेतमळे तसेच प्रवासात असलेेल्या बालकांपर्यंत पोहोचण्यासाठी प्रशासनाने विशेष काळजी घेतली होती. यासाठी जिल्ह्यात 211 मोबाइल टीम्स आणि 109 ट्रान्झिट टीम्सची स्थापना करण्यात आली होती.
पहिल्या दिवशी बूथवर न येऊ शकलेल्या उर्वरित बालकांसाठी पुढील तीन दिवस आशा आणि आरोग्य कर्मचार्‍यांमार्फत ‘घरोघरी’ खझझख फॉलोअप मोहीम राबवून जिल्ह्याचे 100 टक्के उद्दिष्ट पूर्ण केले जाईल, एकही बालक पोलिओ लसीकरणापासून वंचित राहू नये यासाठी प्रयत्नात राहू, अशी माहिती जिल्हा आरोग्य प्रशासनाकडून देण्यात आली आहे.
ही मोहीम यशस्वी करण्यासाठी नाशिक जिल्ह्यातील सर्व तालुका आरोग्य अधिकारी, वैद्यकीय अधिकारी आणि कर्मचारी, आरोग्यसेवक, आरोग्यसेविका, आशा स्वयंसेविका, आणि अंगणवाडी कार्यकर्त्या यांनी अतोनात परिश्रम घेतले. त्याचप्रमाणे शिक्षण व बालविकास विभाग, बालविकास विभाग, महाराष्ट्र वीज वितरण विभाग, एसटी बस स्टँड, रेल्वे विभाग यांचेदेखील सहकार्य मिळाले.
Nashik leads in Pulse Polio vaccination.