जुलैची दमदार सुरुवात; पहिल्याच पावसाने दिलासा

24 तासांत 7.7 मिलिमीटर पावसाची नोंद; पुढील दोन दिवस जिल्ह्याला यलो अलर्ट

नाशिक : प्रतिनिधी
पावसाने निराश केलेल्या जूननंतर जुलैची सुरुवात मात्र नाशिककरांसाठी दिलासादायक ठरली. महिन्याच्या पहिल्याच दिवशी शहरात सकाळपासून रिमझिम पावसाने हजेरी लावल्याने उकाड्यापासून नागरिकांना दिलासा मिळाला. दिवसभर पावसाची उघडझाप सुरू राहिल्याने वातावरणात गारवा निर्माण झाला.
भारतीय हवामान विभागाच्या नोंदीनुसार, बुधवारी (दि. 1 जुलै) सकाळी 8.30 पर्यंतच्या 24 तासांत शहरात 7.7
मिलिमीटर पावसाची नोंद झाली. या पावसामुळे शहरातील वातावरण प्रसन्न झाले आहे. गेल्या महिनाभरापासून दमदार पावसाच्या प्रतीक्षेत असलेल्या नाशिककरांच्या अपेक्षा पुन्हा उंचावल्या आहेत.
यंदाच्या जूनमध्ये अपेक्षेपेक्षा अत्यल्प पाऊस झाल्याने शेतकरी, नागरिक व प्रशासन चिंतेत होते. खरीप हंगामातील पेरण्या, धरणांतील साठा आणि पिण्याच्या पाण्याचे नियोजन यावर त्याचा परिणाम झाला आहे. त्यामुळे जुलै महिन्यात समाधानकारक पाऊस होणे आवश्यक मानले जात आहे.
दरम्यान, हवामान विभागाने पुढील दोन दिवस नाशिक जिल्ह्यासाठी यलो अलर्ट जारी केला आहे. काही ठिकाणी मध्यम ते जोरदार पावसाची शक्यता वर्तवली आहे. त्यामुळे येत्या दोन दिवसांत पावसाचा जोर वाढण्याची अपेक्षा व्यक्त केली जात आहे.
शहरात दिवसभर ढगाळ वातावरण कायम राहिले आहे. अधूनमधून पडणार्‍या सरींमुळे नागरिकांना उकाड्यापासून दिलासा मिळाला. शेतकर्‍यांनाही या पावसामुळे काही प्रमाणात आशा निर्माण झाली आहे. जुलैमध्ये सातत्याने पाऊस झाल्यास खरीप हंगामाला मोठा
आधार मिळेल.

A strong start to July; the very first rain brings relief.