बिबट्याच्या भीतीने पळाला; खड्ड्यात पडून तरुणाचा मृत्यू

नळवाडी-चिकणी रस्त्यावरील घटना

सिन्नर : प्रतिनिधी
नळवाडी-चिकणी रस्त्यावर बिबट्या दिसल्याने घाबरून पळणार्‍या तरुणाचा खोल खड्ड्यात पडून मृत्यू झाल्याची दुर्दैवी घटना घडली. अमोल दामोदर आंधळे (वय 35, रा. प्रतापपूर, ता. संगमनेर, जि. अहिल्यानगर) असे मृत तरुणाचे नाव असून, दोन दिवस उपचार सुरू असताना त्यांची मृत्यूशी सुरू असलेली झुंज अखेर अपयशी ठरली.
याबाबत दादापाटील सखाराम शेळके (रा. नांदूरशिंगोटे, ता. सिन्नर) यांनी पोलिसांना खबर दिली. पोलिसांनी दिलेल्या माहितीनुसार, अमोल आंधळे हे 9 मे रोजी सकाळी सहाच्या सुमारास नळवाडी येथून चिकणी गावाकडे पायी जात होते. त्यावेळी रस्त्यालगत त्यांना बिबट्या दिसल्याने ते घाबरून पळू लागले. पळत असताना मंदिराजवळील खोल खड्ड्यात ते पडले. या अपघातात त्यांच्या डोक्याला आणि शरीराला गंभीर दुखापत झाली.
जखमी अवस्थेत त्यांना प्रथम संगमनेर येथील डॉ. वर्पे हॉस्पिटलमध्ये दाखल करण्यात आले. त्यानंतर पुढील उपचारासाठी पीएमटी हॉस्पिटल, लोणी येथे हलविण्यात आले. पुढे एसएमबीटी हॉस्पिटल, घोटी-धारणगाव येथे उपचार सुरू असताना 11 मे रोजी दुपारी साडेबारा वाजेच्या सुमारास डॉक्टरांनी त्यांना मृत घोषित केले.
या घटनेमुळे परिसरात हळहळ व्यक्त होत असून, नळवाडी-चिकणी परिसरात बिबट्याच्या वाढत्या वावरामुळे नागरिकांमध्ये भीतीचे वातावरण निर्माण झाले आहे. या प्रकरणी पोलिसांनी अकस्मात मृत्यूची नोंद केली असून, पुढील तपास सुरू आहे.

A young man died after falling into a pit after running away from a leopard