अल्पवयीन मुलीला लग्नाचे आमिष; धमकी देत 12 लाख उकळल्याचा आरोप

नाशिकरोड : विशेष प्रतिनिधी
एका युवकाने अल्पवयीन मुलीला लग्नाचे आमिष दाखवले, तिला धमकावून तिच्याशी शारीरिक संबंध प्रस्थापित केल्यानंतर तिचे न्यूड फोटो नातेवाइकांना पाठवण्याची धमकी देऊन तिच्याकडून 12 लाख रुपये उकळल्याचा आरोप करण्यात आला आहे. पीडित युवतीच्या तक्रारीवरून पोलिसांनी गुन्हा दाखल केला आहे.
पीडितेने दिलेल्या तक्रारीनुसार, हा छळ 2019 पासून आतापर्यंत सतत सुरू होता. जेव्हा हा प्रकार सुरू झाला तेव्हा पीडिता अल्पवयीन होती.
आरोपी महेंद्र संपत पोरजे याने मुलगी अल्पवयीन असल्याचे माहीत असूनही तिला लग्नाचे आमिष दाखवले. आरोपीने पीडितेला घाबरवण्यासाठी तिचे न्यूड फोटो काढले आणि ते तिच्या नातेवाइकांना पाठवण्याची धमकी देऊ लागला. नंतर आरोपीने वेगवेगळ्या ठिकाणी पीडितेवर बळजबरीने शारीरिक संबंध ठेवले. आरोपी एवढ्यावरच थांबला नाही, त्याने पीडितेचे न्यूड फोटो तिच्या कुटुंबीयांना दाखवण्याची आणि तिला आत्महत्येस प्रवृत्त करण्याची धमकी दिली. आरोपीने आतापर्यंत सुमारे 12 लाख रुपयेदेखील उकळले. अखेर धीर एकवटून पीडितेने उपनगर पोलीस ठाण्यात आरोपीविरुद्ध तक्रार दाखल केली. याप्रकरणी पुढील तपास सहाय्यक निरीक्षक वायकर या करीत आहेत.

Allegation of extorting ₹12 lakh from a minor girl by luring her with marriage and issuing threats.