गर्भवती महिलांना मोफत प्रसूतिपूर्व सेवा

प्रधानमंत्री सुरक्षित मातृत्व अभियान दशकपूर्तीनिमित्त विशेष आरोग्य शिबिरे

नाशिक : प्रतिनिधी
‘माझं गाव-आरोग्यसंपन्न गाव’ उपक्रमांतर्गत नाशिक जिल्ह्यात 9 जून रोजी प्रधानमंत्री सुरक्षित मातृत्व अभियानाच्या दशकपूर्तीनिमित्त सर्व शासकीय आरोग्य संस्थांमध्ये गर्भवतींसाठी विशेष आरोग्य शिबिरे व जनजागृती मोहीम आयोजित केली आहे.
नाशिक जिल्ह्यात केंद्र व राज्य शासनातर्फे राबविण्यात येणार्‍या प्रधानमंत्री सुरक्षित मातृत्व अभियानाला यशस्वी दहा वर्षे पूर्ण झाली आहेत. यानिमित्ताने ‘माझं गाव-आरोग्यसंपन्न गाव’ संकल्पनेंंतर्गत जिल्ह्यातील सर्व आयुष्मान आरोग्य मंदिरे, प्राथमिक आरोग्य केंद्रे, ग्रामीण रुग्णालये, उपजिल्हा रुग्णालये व जिल्हा रुग्णालयांत विशेष आरोग्य शिबिर घेण्यात आले आहे.
राज्याचे आरोग्यमंत्री प्रकाश आबिटकर व राज्यमंत्री मेघना साकोरे-बोर्डीकर यांच्या मार्गदर्शनाखाली हा उपक्रम राबविण्यात येत आहे.
या अभियानांतर्गत गर्भधारणेच्या दुसर्‍या व तिसर्‍या तिमाहीतील महिलांना दर महिन्याच्या 9 तारखेला तज्ज्ञ डॉक्टरांच्या मार्गदर्शनाखाली मोफत प्रसूतिपूर्व आरोग्यसेवा, रक्त व लघवी तपासणी, समुपदेशन, तसेच आवश्यकतेनुसार सोनोग्राफीसाठी संदर्भ सेवा दिली जात आहे. उच्च जोखमीच्या गर्भवतींची विशेष नोंदणी करून त्यांच्यावर उपचार व नियमित पाठपुरावा केला
जाणार आहे.
आशा स्वयंसेविका व सहायक परिचारिका यांच्यामार्फत उच्च जोखमीच्या गर्भवतींच्या घरी किमान तीन पाठपुरावा भेटी सुनिश्चित करण्यात येणार आहेत. दुर्गम भागातील महिलांपर्यंत ही सेवा पोेहोचविण्यासाठी विशेष प्रयत्न केले जात आहेत. पीएमएसएमएची दहा वर्षे-सुरक्षित गर्भधारणा, निरोगी माता, सक्षम भारत या घोषवाक्यांतर्गत जनजागृती मोहिमाही राबविण्यात येत आहेत.

आपले गाव आरोग्यसंपन्न करायचे असेल तर माता व बाळ निरोगी असणे अत्यंत गरजेचे आहे. ‘माझं गाव- आरोग्यसंपन्न गाव’ या भावनेतून नाशिक जिल्ह्यातील जास्तीत जास्त गर्भवतींंनी पुढे येऊन या मोफत, सुरक्षित आणि गुणवत्तापूर्ण आरोग्य सेवांचा लाभ घ्यावा.
– डॉ. हर्षल नेहेते, जिल्हा माता व बालसंगोपन अधिकारी, नाशिक

Free prenatal services for pregnant women