कुंभमेळा नियोजनात ‘आर्ट ऑफ लिव्हिंग’चे स्वयंसेवक

श्री श्री रविशंकर यांच्याशी मंत्री महाजन यांची चर्चा

नाशिक : प्रतिनिधी
आगामी नाशिक-त्र्यंबकेश्वर कुंभमेळ्याच्या नियोजनासाठी राज्य शासनाने तयारीला वेग दिला असून, आता सामाजिक व आध्यात्मिक संस्थांचाही सहभाग वाढताना दिसत आहे. कुंभमेळामंत्री गिरीश महाजन यांनी गुरुवारी (दि. 21) बेंगळुरू येथील द आर्ट ऑफ लिव्हिंग फाउंडेशन आश्रमात परमपूज्य श्री श्री रविशंकर यांची भेट घेऊन आगामी कुंभमेळ्याच्या नियोजनावर सखोल चर्चा केली.
या भेटीत मंत्री महाजन यांनी गुरुदेवांना आगामी नाशिक-त्र्यंबकेश्वर कुंभमेळ्यास उपस्थित राहण्याचे निमंत्रण दिले. गुरुदेव श्री श्री रविशंकर यांनी हे निमंत्रण स्वीकारत कुंभमेळ्यासाठी संस्थेच्या स्वयंसेवकांचे सहकार्य देण्याबाबत सकारात्मक भूमिका दर्शविली.
मंत्री महाजन यांनी मुख्यमंत्री देवेंद्र फडणवीस यांच्या मार्गदर्शनाखाली राज्य शासनाकडून सुरू असलेल्या विकासकामांची माहिती सादर केली.
देश-विदेशातून कोट्यवधी भाविक नाशिक-त्र्यंबकेश्वर कुंभमेळ्यासाठी येत असल्याने प्रशासनासमोर गर्दी व्यवस्थापन, वाहतूक नियंत्रण, स्वच्छता व भाविकांना मार्गदर्शन यांसारखी मोठी आव्हाने उभी राहतात. या पार्श्वभूमीवर मंत्री महाजन यांनी ‘आर्ट ऑफ लिव्हिंग’च्या व्यापक स्वयंसेवक नेटवर्कचे सहकार्य मिळावे, अशी विनंती केली. त्यास प्रतिसाद देत गुरुदेवांनी मोठ्या संख्येने स्वयंसेवक उपलब्ध करून देण्याची ग्वाही दिली.
दरम्यान, मंत्री महाजन यांनी आश्रमातील विविध उपक्रमांची पाहणी केली. यावेळी स्वामी वैशंपायन, विशाल चव्हाण आणि नीलेश बोरा उपस्थित होते.

Art of Living volunteers help plan Kumbh Mela

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.