खरीप हंगामासाठी पैसे नसल्याने बळीराजा हतबल

यांत्रिकीकरणामुळे मशागत खर्चात वाढ, सोसायटीतून कर्जपुरवठा करावा

अस्वली स्टेशन : प्रतिनिधी
भाताचे आगार समजल्या जाणार्‍या इगतपुरी तालुक्यात काही दिवसांवर येऊन ठेपलेल्या खरीप हंगाम नियोजनासाठी जमीन मशागतीच्या तयारीसाठी शेतकर्‍यांची लगबग सुरू आहे. मात्र, पुढील नियोजनासाठी पैसे शिल्लक नसल्याने बळीराजा हतबल झाला आहे.
शेतीसाठी लागणारी नांगर, वखर, सारायंत्र, तीफण, पाबर, कोळप आदी पारंपरिक औजारे कारागिरांकडून बनवली जात होती. मात्र, आता त्या पद्धतीचे गावोगावी कारागीर राहिले नसल्याने शेतकरी आधुनिक यांत्रिकीकरणाकडे वळला आहे. महागाईमुळे औजारानादेखील अडीच ते तीन हजार खर्च येत असल्याने शेतकर्‍यांच्या खिशाला परवडणारे नसल्याने शेतकरी चिंताग्रस्त आहे. कालौघात शेतकरी आधुनिक शेतीकडे वळला.
ट्रॅक्टरच्या माध्यमातून मशागत करण्यासाठी अडीच ते तीन हजार रुपये भाव एकरी मोजावा लागतो. काही आदिवासी भागात शेतजमिनीची मशागत पारंपरिक पद्धतीने केली जाते. भाताचा तालुका म्हणून प्रसिद्ध असलेल्या तालुक्याच्या महसुली गावात अनेक शेतकरी पावसाळ्यात भात लागवड करतात. मे महिन्याच्या शेवटच्या आठवड्यात खरीप हंगामाच्या जोरदार तयारीसाठी जमीन मशागतीची कामे केली जातात. मात्र, अवकाळीने झालेल्या नुकसानीमुळे शेतकर्‍यांकडे जमीन मशागतीसाठी पैसेच नसल्याने हतबल झाले आहेत. अशातच बाजारात मशागतीच्या औजारांना मागणी वाढली आहे. एखाद्या योजनेची अंमलबजावणी करावी, असे शेतकर्‍यांनी सांगितले.

पिण्यासाठी पाणी आणि जनावरांसाठी चारा मिळावा यासाठी शेतकर्‍यांची भटकंती सुरू आहे. घेतलेल्या बागाईत पिकालाही कवडीमोल भाव व अवकाळीच्या नुकसानीमुळे शेतकर्‍यांची आर्थिक परिस्थिती ढासळली आहे. खरीप पेरणीसाठी पैसे उपलब्ध नसल्याने गरीब शेतकरी सैरभैर झाला आहे. बी-बियाणे, कोळपणी, नांगरणीसाठी शासनाने एकरी वीस हजारांची सरसकट आर्थिक मदत करावी. विविध कार्यकारी सोसायटीच्या माध्यमातून शेतकर्‍यांना खरीप हंगामासाठी कर्जपुरवठा करावा.
– योगेश सुरुडे, व्हाइस चेअरमन, देवळे कार्यकारी सोसायटी