पंचवटी परिसरातील घरफोडीचा गुन्हा उघड

तीन आरोपी जेरबंद; गुन्हेशाखा युनिट क्रमांक 2 ची कारवाई

सिडको : विशेष प्रतिनिधी
पंचवटी परिसरात घडलेल्या घरफोडी प्रकरणातील आरोपींना गुन्हेशाखा युनिट क्रमांक 2 च्या पथकाने अटक केली आहे. त्यांच्याकडून दोन लाख पन्नास हजार रुपयांची स्कोडा कार जप्त करण्यात आली. आरोपींपैकी एकावर नाशिक ग्रामीण परिसरातील निफाड, ओझर व सायखेडा पोलिस ठाण्यात गुन्हे दाखल आहेत.
शहरातील मालमत्ताविषयक गुन्हे उघडकीस आणण्याच्या पोलिस आयुक्त संदीप कर्णिक यांनी सूचना दिल्या होत्या. त्यानुसार गुन्हेशाखा युनिट 2 चे अधिकारी व कर्मचारी पोलिस नाईक मनोहर शिंदे, पोलिस शिपाई महेश खांडबहाले यांना क्रांंतीनगर, मखमलाबाद रोड येथे दिवसा घरफोडी करून काही जण विल्होळीजवळील डीमार्टजवळून पाथर्डी गावाच्या दिशेने कारने जात असल्याची माहिती मिळाली होती.
मिळालेल्या माहितीनुसार, सहायक पोलिस निरीक्षक हेमंत तोडकर यांच्या मार्गदर्शनाखाली पथकाने पाथर्डी शिवारातील कचरा डेपोजवळ सापळा रचून तिघांना ताब्यात घेतले. अटक करण्यात आलेल्यांत सागर दत्तात्रय गरड (वय 33), महेश सदाशिव मालखेडे (21) आणि एक विधिसंघर्षित बालक यांचा समावेश आहे. चौकशीत त्यांनी क्रांतीनगर, मखमलाबाद येथील घरफोडीची कबुली दिली. त्यांच्याकडून चोरीस गेलेला लॅपटॉप व घड्याळ हस्तगत करण्यात आले आहे.
याप्रकरणी पंचवटी पोलिस ठाण्यात गुन्हा दाखल करण्यात आला आहे. ही कारवाई गुन्हेशाखा युनिट क्रमांक 2 चे प्रभारी सहायक पोलिस निरीक्षक हेमंत तोडकर, डॉ. समाधान हिरे, बाळू शेळके, शंकर काळे, गुलाब सोनार, संजय सानप, प्रकाश बोडके, मनोहर शिंदे, चंद्रकांत गवळी व तेजस मते यांनी केली.