सिन्नरला भरदिवसा घरफोडी

अर्ध्या तासात 75 हजारांचा ऐवज लांबविला; गुन्हा दाखल

सिन्नर ः प्रतिनिधी
शहरातील विजयनगर भागात फ्लॅटला कुलूप लावून शेजारील अपार्टमेंटमध्ये गेल्याची संधी साधत अज्ञात चोरट्यांनी तीर्थराज अपार्टमेंटमधील बंद फ्लॅटचा कडीकोयंडा तोडून घरफोडी करत रोख रकमेसह सोन्याचे दागिने मिळून 73 हजार 400 रुपयांचा ऐवज चोरून नेल्याची घटना शुक्रवारी (दि.10) दुपारी 12.15 ते 12.45 वाजेच्या सुमारास घडली.

दरम्यान, पोलिस स्टेशनपासून अगदी जवळ असलेल्या विजयनगर भागात भरदिवसा अन् केवळ अर्ध्या तासातच चोरट्यांनी घरफोडी केल्याने चोरट्यांचे धाडस दिवसेंदिवस वाढत असल्याचे या घटनेवरून अधोरेखित झाले आहे. विजयनगर परिसरात तीर्थराज अपार्टमेंटमधील फ्लॅट नं. 3 मध्ये शिनाबाई बाळकृष्ण सानप या कुटुंबीयांसह वास्तव्यास असून, शुक्रवारी (दि.10) दुपारी 12.15 वाजेच्या सुमारास शिनाबाई आपल्या फ्लॅटच्या दरवाजाला कुलूप लावून शेजारील अपार्टमेंटमध्ये गेल्या असता अज्ञात चोरट्यांनी पाळत ठेवत सानप यांच्या बंद फ्लॅटच्या दरवाजाचा कडीकोयंडा तोडून आत प्रवेश केला व कपाटाच्या ड्रॉवरमध्ये ठेवलेले 7 हजार रुपये रोख रकमेसह 31 हजार 673 रुपये किमतीचे 3.040 ग्रॅम वजनाचे बी. टॉप्स व लटकन 2 नग, 18 हजार 542 रुपये किमतीची 1.780 ग्रॅम वजनाच्या कानातील सोन्याच्या रिंगा 2 जोड, 16 हजार 185 रुपये किमतीची 1.510 ग्रॅम सोन्याची लहान मुलाच्या कानातील बाळी 1 नग असा एकूण 734 हजार 400 रुपयांचा ऐवज चोरून नेला. दुपारी 12.45 वाजेच्या सुमारास शिनाबाई सानप आपल्या घरी परतल्या असता, घरफोडी झाल्याचे त्यांच्या निदर्शनास येताच शिनाबाई सानप यांनी सिन्नर पोलिस ठाण्यात धाव घेऊन फिर्याद दाखल केली. सानप यांच्या फिर्यादीवरून सिन्नर पोलिसांनी अज्ञात चोरट्यांविरोधात चोरीचा गुन्हा दाखल केला. तपास हवालदार जाधव करीत आहेत.