नागपुरात रात्री कारला आग

नागपूर : वर्धा मार्गाने घरी जात असताना अचानक कारमधून धूर निघायला लागला. चालकाने कार थांबवली आणि कारमधून बाहेर पडताच कारचा भडका उडाला. ही घटना शनिवारी रात्री छत्रपती उड्डाणपुलावर घडली. प्रतापनगर पोलिस व अग्निशमन यंत्रणाही पोहोचली. आगीवर नियंत्रण मिळविण्यात आले. हर्षल महाजन (वय 35, रा. बुटीबोरी) असे कारचालकाचे नाव आहे. हर्षल मूळचे अकोल्याचे असून, नागपुरात नोकरी करतात. शनिवारी रात्री कार्यालयातील काम आटोपून ते एमएच-30-एए-4485 या क्रमांकाच्या कारने घराकडे निघाले होते. छत्रपती उड्डाणपुलापर्यंत गेले असता, कारच्या मागच्या भागातून धूर निघायला लागला. मागच्या वाहनचालकाने लगेच ही माहिती दिली. हर्षलने लगेच कार थाबवली आणि बाहेर पडले. क्षणभरात कारने भडका घेतला. रस्त्याने जाणार्‍या वाहनचालकाने सांगितले नसते तर अनर्थ घडला असता.