मनमाडला अर्धी वाळू टाकून दुप्पट पैसे घेणार्‍या वाळू विक्रेत्यावर गुन्हा दाखल

मनमाड ः प्रतिनिधी
मनमाड शहर परिसरातील बांधकाम व्यावसायिकांसह घराचे बांधकाम करणार्‍या नागरिकांना अर्धी वाळू टाकून दुप्पट (डबल) बिल देऊन जास्त पैसे घेत फसवणूक करण्याचा प्रकार उघडकीस आला. याबाबत मनमाड शहर पोलीस ठाण्यात गुन्हा दाखल करण्यात आला आहे. घराचे बांधकाम करणार्‍या नागरिकांनी शहानिशा करूनच वाळू खरेदी करावी, असे आवाहन पोलीस निरीक्षक विजय करे यांनी केले आहे.
याबाबत सविस्तर माहिती अशी की, मनमाड शहर परिसरात अनेक वाळू विक्रेते आहेत. एजंटही आहेत. मात्र, काही एजंटकडून तसेच काही वाळू विक्रेत्यांकडून 42 ब्रास वाळू 80 ब्रास सांगून दुप्पट पैसे उकळण्याचा गोरखधंदा सुरू आहे. याचा मनमाड शहर पोलीस निरीक्षक करे यांनी पर्दाफाश केला आहे. याबाबत मनमाड शहर पोलीस ठाण्यात फसवणुकीचा गुन्हा दाखल करण्यात आला आहे. हा सर्व प्रकार वे-ब्रिज(वजनकाटा)ला हाताशी धरून सुरू असल्याचे समोर आले आहे. वजन करताना एक पूर्ण गाडी उभी करून दुसर्‍या गाडीचा मागचा भाग वजनकाट्यावर उभा करायचा.
यामुळे वजनात दुप्पट वाढ होऊन बिलाची पावती 40 ऐवजी 80 ब्रासची येते. हीच पावती देऊन ग्राहकांकडून दुप्पट पैसे उकळण्याचा गोरखधंदा राजरोस सुरू होता. पोलिसांनी याबाबत गुन्हा दाखल करून एकाला अटक केली आहे. विशेष म्हणजे, याची मोठी साखळी कार्यरत आहे. त्याचा सखोल तपास सुरू आहे. आजपर्यंत किती लोकांना फसवले, याचाही तपास सुरू आहे.

वाळू चोरीचा हा नवीन प्रकार समोर आला आहे. शहरातील अनेक व्यावसायिकांचीदेखील फसवणूक झाल्याचे समोर आले आहे. यात काही वाळू विक्रेते, तर काही वाळू विक्री करणारे एजंट आहेत. या सर्वांचा आम्ही तपास सुरू केला आहे. शहरातील बांधकाम व्यावसायिक व बांधकाम सुरू असणार्‍यांंनी वाळू विकत घेताना तपासून घ्यावी. काही शंका आली तर गाडीचे पुन्हा वजन करून घ्यावे.
– विजय करे, पोलीस निरीक्षक, मनमाड