देशवंडीत ‘जलकवच’ प्रकल्पातून सिमेंट नाला बांध

2 कोटी 50 लाख लिटर अतिरिक्त पाणी साठवण क्षमता

सिन्नर : प्रतिनिधी
सिन्नर तालुक्यातील देशवंडी येथे ग्लेनमार्क फाउंडेशन यांच्या सहकार्याने युवा मित्र संस्थेने ‘जलकवच’ प्रकल्पांतर्गत सिमेंट नाला बांध उभारला असून, नाल्यातील सुमारे 20 हजार घनमीटर गाळाचा उपसा करण्यात आला आहे. या कामांमुळे परिसरात 2 कोटी 50 लाख लिटर अतिरिक्त पाणी साठवण क्षमता निर्माण झाली असून, भूजल पुनर्भरणाला मोठी चालना मिळणार आहे. युवा मित्रच्या संचालक मनीषा पोटे यांच्या नेतृत्वाखाली हा उपक्रम राबवण्यात आला.
या प्रकल्पामुळे सुमारे 350 हेक्टर क्षेत्राला सिंचनाचा लाभ होणार असून, 75 बोअरवेल व खुल्या विहिरींच्या पाणीपातळीत वाढ होण्यास मदत होईल. त्यामुळे 135 शेतकर्‍यांना अधिक सुरक्षित व शाश्वत पाणी उपलब्ध होऊन त्यांच्या शेतीसह उपजीविकेलाही बळ मिळणार आहे.
जलसंधारण, भूजल पुनर्भरण आणि हवामान बदलाच्या पार्श्वभूमीवर ग्रामीण भागाची जलसुरक्षा मजबूत करण्याच्या उद्देशाने हा उपक्रम राबविण्यात आला आहे. जलस्रोतांचे संवर्धन आणि पाण्याचा शाश्वत वापर यासाठी अशा प्रकल्पांची गरज अधोरेखित होत असून, आज जपलेला प्रत्येक थेंब उद्याच्या जलसुरक्षित आणि समृद्ध ग्रामीण भविष्याची पायाभरणी करतो, असा संदेश या उपक्रमातून देण्यात आला.

♦ 350 हेक्टर क्षेत्राला सिंचनाचा आधार
♦ 75 विहिरी व बोअरवेलचे भूजल पुनर्भरण
♦ 135 शेतकर्‍यांना थेट लाभ

Cement drain dam built in Deshwandi through ‘Jalkavach’ project