ठार मारण्याचा प्रयत्न करणारा गुन्हेगार जेरबंद

गुन्हेशाखा युनिट क्र. 1 ची कारवाई

सिडको : विशेष प्रतिनिधी
नांदूर नाका येथील महापालिकेच्या गार्डनमध्ये पावभाजी खात असताना फिर्यादीस प्रकाश विसपुते ऊर्फ पक्या खटकी याने लाकडी दांडक्याने मारहाण केली. या मारहाणीमुळे ठार मारण्याचा प्रयत्न झाल्याच्या फिर्यादीवरून आडगाव पोलिस ठाण्यात दाखल गुन्हा दाखल करण्यात आला आहे.
याप्रकरणी गुन्हे शाखेने पथक तयार करून संशयिताच्या शोधादरम्यान तो बटुक हनुमान मंदिराकडे जाणार्‍या रस्त्यावर सापडला. त्याला ताब्यात घेतल्यावर त्याने स्वतःचे नाव प्रकाश राजेंद्र विसपुते ऊर्फ पक्या खटकी (वय 40, रा. आम्रपाली झोपडपट्टी, म्हसोबा मंदिराजवळ, उपनगर, नाशिक) असे सांगितले.
दरम्यान, संशयित प्रकाश विसपुते याच्याविरोधात पुढील कारवाईसाठी त्याला आडगाव पोलिस ठाण्यात हजर करण्यात आले आहे. पुढील तपास सुरू आहे. ताब्यात घेतलेल्या संशयित आरोपीवर यापूर्वीही भद्रकाली पोलिस ठाण्यात तीन गंभीर स्वरूपाचे गुन्हे दाखल झाले आहेत. तसेच पंचवटी आणि आडगाव पोलिस ठाणे, तसेच विविध पोलिस ठाण्यांत गुन्हे दाखल आहेत.
ही संपूर्ण कारवाई गुन्हेशाखा युनिट क्र. 1 चे वरिष्ठ पोलीस निरीक्षक मधुकर कड, सहाय्यक पोलिस निरीक्षक हिरामण भोये, पोलिस उपनिरीक्षक सुदाम सांगळे, हवालदार प्रवीण वाघमारे, प्रशांत मरकड, प्रदीप म्हसदे, संदीप भांड, योगीराज गायकवाड, विशाल काठे, नाझीमखान पठाण, मिलिंदसिंग परदेशी, पोलिस अंमलदार अमोल कोष्टी, जगेश्वर बोरसे, मुक्तार शेख आणि समाधान पवार यांच्या संयुक्त पथकाने केली.