फर्निचर खरेदी करताना दुकानात विसरलेली एक लाखाची बॅग चोरीला

अज्ञात चोरट्याविरुद्ध गुन्हा दाखल

सिडको : विशेष प्रतिनिधी
शिंगाडा तलाव परिसरातील स्टार लाइन फर्निचर दुकानात फर्निचर खरेदीसाठी आलेल्या ग्राहकाची एक लाख रुपयांची बॅग चोरीला गेल्याची घटना समोर आली आहे. याप्रकरणी अज्ञात चोरट्याविरोधात मुंबई नाका पोलीस ठाण्यात गुन्हा दाखल करण्यात आला आहे.
फिर्यादी जनार्दन हरी खोटरे (वय 40 वर्षे, रा. महात्मानगर, पारीजातनगर, नाशिक) हे त्यांची पत्नी ज्योती खोटरे व मित्र महेंद्र देवचंद महाले यांच्यासह ‘स्टार लाइन फर्निचर’ या दुकानात फर्निचर खरेदीसाठी गेले होते. त्यांनी दुकानात सुमारे 30 हजार रुपये देऊन खरेदी केली. याचवेळी त्यांच्याकडील गुलाबी रंगाची बॅग, ज्यामध्ये एक लाख रुपयांची रोकड होती ती दुकानात विसरली गेली. बॅग हरवल्याचे लक्षात आल्यावर दुकानात शोध घेण्यात आला, मात्र, बॅग मिळून आली नाही. कोणीतरी अज्ञात चोरट्याने बॅग चोरून नेल्याचे स्पष्ट झाले आहे. या घटनेनंतर जनार्दन खोटरे यांनी मुंबई नाका पोलीस ठाण्यात अज्ञात इसमाविरोधात गुन्हा दाखल करण्यात आला आहे. पुढील तपास पोलिस नाईक जाधव यांच्या मार्गदर्शनाखाली सुरू आहे.