फडणवीसांचाही होणार होता ’गेम’ : जरांगेंचा दावा

मुंबई / जालना : प्रतिनिधी
कथित पाचशे कोटी रुपयांच्या ऑडिओ क्लिप प्रकरणात उपमुख्यमंत्री एकनाथ शिंदे यांच्यासोबतच मुख्यमंत्री देवेंद्र फडणवीस यांचाही राजकीय ’गेम’ करण्याचा डाव होता, असा नवा दावा मनोज जरांगे यांनी केला आहे. दुसरीकडे, खासदार संजय राऊत यांनी थेट केंद्रीय गृहमंत्री अमित शहा यांना पत्र लिहून या संपूर्ण प्रकरणाची सक्तवसुली संचालनालयामार्फत (ईडी) चौकशी करण्याची मागणी केली आहे.
जरांगेंनी पत्रकार परिषदेत या ऑडिओ क्लिपमागील राजकीय षडयंत्रावर भाष्य केले.
हा प्रकार म्हणजे शिवसेना पक्षावर केलेला घाव नसून, उपमुख्यमंत्री एकनाथ शिंदे यांची वैयक्तिक प्रतिष्ठा आणि राजकीय करिअर उद्ध्वस्त करण्यासाठी रचलेले मोठे षडयंत्र होते. या प्रकरणाच्या खोलात गेल्यास केवळ एकनाथ शिंदे यांचाच नव्हे, तर मुख्यमंत्री देवेंद्र फडणवीस यांचाही मोठा ’गेम’ होणार होता, अशी चर्चा असल्याचा दावा जरांगे यांनी केला. 500 कोटींच्या या व्यवहाराबाबत कदाचित फडणवीसांना कल्पना नसावी. मात्र, हे प्रकरण दाबण्याचा प्रयत्न केल्यास यात भाजपचेच नेते गुंतले होते, हे सिद्ध होईल आणि फडणवीस व शिंदे दोघेही अडकतील, असा इशारा जरांगे यांनी दिला आहे.

संजय राऊत यांचे अमित शहा यांना पत्र
शिवसेना (उद्धव बाळासाहेब ठाकरे) पक्षाचे खासदार संजय राऊत यांनी केंद्रीय गृहमंत्री अमित शहा यांना अधिकृत पत्र पाठवून या प्रकरणात हस्तक्षेप करण्याची मागणी केली आहे. आतापर्यंत भाजपने खासदार, आमदार, राजकीय पक्ष आणि निवडणुका विकत घेतल्या; आता आंदोलनंही विकत घेण्यास सुरुवात केली आहे, असा आरोप राऊत यांनी पत्रात केला आहे.

Fadnavis was also going to be ‘outmaneuvered’: Jarange’s claim