लखाणेत बनावट मद्यनिर्मिती कारखाना उद्ध्वस्त

कारवाईत वाहनासह साडेचौदा लाखांचा मुद्देमाल जप्त

मालेगाव : प्रतिनिधी
राज्य उत्पादन शुल्क मालेगाव विभागाच्या पथकाने तालुक्यातील लखाणे शिवारातील बांधीव पत्राशेडमध्ये छापा टाकून बनावट मद्य निर्मितीचा कारखाना उद्ध्वस्त केला. या कारवाईत वाहनासह 14 लाख 51 हजार 240 रुपये किमतीचा मुद्देमाल जप्त करण्यात आला.
लखाणे शिवारातील बांधीव पत्राशेडमध्ये बनावट मद्य निर्मितीचा कारखाना सुरू असल्याची माहिती राज्य उत्पादन शुल्क विभागाच्या मालेगाव पथकाला मिळाली होती. या पथकाने त्याठिकाणी छापा टाकला असता, मद्यनिर्मितीसाठी लागणारे साहित्य, विविध प्रकारच्या बनावट मद्याच्या भरलेल्या व रिकाम्या बाटल्या, तसेच मद्यसाठा वाहतुकीकरिता वापरण्यात येणारी सफेद चार चाकी वाहन (एमएच 18- एम 3680) व एक दुचाकी (एमएच 08- एआर 6418) या दोन्ही वाहनांसह 14 लाख 51 हजार 240 रुपयांचा राज्यात वाहतुकीस व विक्रीस प्रतिबंध असलेला व बनावट मुद्देमाल जप्त करण्यात आला.
या गुन्ह्यात मद्यसाठानिर्मिती करणारा व मद्यसाठा घेणारा पुरवठादार, तसेच जप्त वाहनमालक यांच्याविरोधात व इतर ज्ञात-अज्ञातांंविरोधात गुन्हा नोंदवण्यात आला. ही कारवाई मालेगाव विभागाचे निरीक्षक लीलाधर पाटील, दुय्यम निरीक्षक सागर नलावडे, रियाज शेख, कळवण विभागाचे निरीक्षक सी. एच. पाटील, आर. जे. पाटील, दुय्यम निरीक्षक मनीष पाटील, सहायक दुय्यम निरीक्षक वंदना देवरे, जवान दीपक गाडे, श्याम पानसरे, प्रवीण अस्वले, दिगंबर पालवी, अण्णा बहिरम, गोकुळ परदेशी, राकेश पगारे, अमित गांगुर्डे, राजाराम सोनवणे, यागेश म्हस्के, गणेश शेवगे, अनिल जाधव, राजेंद्र चव्हाणके, संतोष बोराडे व संजय शिंदे यांच्या
पथकाने केली.