भीतीचे सावट कायम; रोज कुठल्या ना कुठल्या भागात वावर
लासलगाव : वार्ताहर
देवगाव परिसरात बिबट्यांच्या वाढत्या हालचालींमुळे ग्रामस्थांमध्ये भीतीचे सावट अधिकच दाट होत असताना, परसराम बोचरे यांच्या देवगाव गट क्रमांक 96/1 मध्ये रात्री साडेअकराला बिबट्या वन विभागाने लावलेल्या पिंजर्‍यात जेरबंद झाला. पन्नास दिवसांत हा पाचवा बिबट्या पकडला गेला आहे. अजूनही देवगाव परिसरात बिबट्याचा वावर असल्याने लोकांमध्ये व शेतकर्‍यांत भीतीचे वातावरण आहे.
गेल्या काही आठवड्यांपासून दर दिवसाला कुठल्या ना कुठल्या भागात बिबट्याचा वावर व हल्ले होत आहेत. परिसरात जनावरांवरील हल्ल्यांंमध्ये वाढ होत आहे. रात्री शेतात जाण्याचा धोका आणि बिबट्यांची सतत होणारी हालचाल यामुळे बिबट्याचा सामना नागरिकांसाठी नित्याचाच झाला आहे. कमी कालावधीत पाच बिबटे पकडले गेल्यामुळे अजूनही देवगाव परिसरात पाच ते सहा बिबटे असल्याचा संशय नागरिकांमध्ये आहे. त्यामुळे शेतकरी, विद्यार्थी व ग्रामस्थ यांच्यात भीतीचे
वातावरण आहे.
वन विभागाने जंगलात सोडलेले बिबटे पुन्हा गावात परतत नाहीत ना? असा संशय ग्रामस्थ व्यक्त करीत आहेत. बिबट्या जेरबंद झाल्यानंतर वनपरिक्षेत्र अधिकारी, वनपाल, वनरक्षक घटनास्थळी धाव घेऊन त्याला ताब्यात
घेतले.
परिसरात आणखी बिबटे असल्याची नागरिकांची खात्री आहे. तातडीने त्यांचा बंदोबस्त करावा व पिंजर्‍यांच्या संख्येत वाढ करावी, अशी जोरदार मागणी नागरिकांकडून होत आहे.
असे झाले बिबटे पिंजराबंद
याआधी 12 नोव्हेंबर 2025 रोजी गावालगत असलेल्या शरद जोशी यांच्या गट क्रमांक 485 मधील पिंजर्‍यात नरभक्षक बिबट्या जेरबंद झाला होता. नंतर 21 नोव्हेंबरला चांगदेव शिंदे यांच्या गट क्रमांक 191 मध्ये दुसरा, 4 डिसेंबर रोजी पोलीसपाटील सुनील बोचरे यांच्या गट क्रमांक 414/2 मध्ये तिसरा, 21 डिसेंबरला म्हसोबानगर (कासली) शिवारात रावसाहेब रोटे यांच्या गट क्रमांक 603 मध्ये चौथा व 7 जानेवारी 2026 रोजी परसराम बोचरे यांच्या देवगाव गट क्रमांक 96/1 मध्ये पाचवा बिबट्या पकडला गेला.
Fifth leopard captured in Devgaon area in fifty days