उद्या वर्षातील पहिले सूर्यग्रहण

नैनिताल : वर्षातील पहिले सूर्यग्रहण मंगळवारी (दि. 17) होणार आहे. हे कंकणाकृती सूर्यग्रहण असेल. कंकणाकृती ग्रहणाचा काही भाग अंटार्क्टिकामधून दिसेल. आर्यभट्ट रिसर्च इन्स्टिट्यूट ऑफ
ऑब्झर्व्हेशनल सायन्सेसचे (एआरआयईएस) माजी संचालक डॉ. वहाबुद्दीन यांनी सांगितले की, सूर्यग्रहण भारतीय प्रमाणवेळेनुसार दुपारी 3.26 वाजता सुरू होईल. सूर्याचा जास्तीत जास्त भाग संध्याकाळी 5.42 वाजता ग्रहणाने झाकला जाईल. कंकणाकृती ग्रहण फक्त दोन मिनिटे चालेल आणि संध्याकाळी 7.57 वाजता संपेल. हे सूर्यग्रहण भारतातून दिसणार नाही.
बहुतेक ग्रहण अंटार्क्टिकाच्या बर्फाळ प्रदेशातून दिसेल. हे सूर्यग्रहण 4,282 किमी लांबीच्या क्षेत्रात दिसेल. डॉ. वहाबुद्दीन यांनी स्पष्ट केले की, जेव्हा चंद्र आणि सूर्य यांच्यातील अंतर मोठे असते तेव्हा कंकणाकृती सूर्यग्रहण होते, तर जेव्हा त्यांच्यातील अंतर कमी असते तेव्हा पूर्ण सूर्यग्रहण होते. अशा परिस्थितीत चंद्र सूर्याला पूर्णपणे झाकतो.
पुढचे सूर्यग्रहण 12 ऑगस्टला
पुढील सूर्यग्रहण 12 ऑगस्ट 2026 रोजी होईल. हे पूर्ण सूर्यग्रहण असेल. हे ग्रहण भारतातूनही दिसणार नाही. त्यानंतर 3 मार्च रोजी चंद्रग्रहण होईल.