चार महिन्यांच्या चिमुकलीचा ना.रोडला उष्माघाताने मृत्यू

नाशिकरोड : विशेष प्रतिनिधी
पुणे जिल्ह्यातील इंदापूर येथून लग्नसमारंभासाठी नाशिकमध्ये आलेल्या एका कुटुंबातील चार महिन्यांच्या चिमुरडीचा उष्माघाताने मृत्यू झाल्याची घटना घडली आहे. या घटनेमुळे परिसरात हळहळ व्यक्त होत आहे.
इंदापूर तालुक्यातील गोथंडी येथील शुभम काटेकर आणि प्रतीक्षा काटेकर हे दाम्पत्य आपल्या चार महिन्यांच्या मुलीसह बुधवारी नाशिकमध्ये आले होते. सामनगाव रोड परिसरातील एका लॉन्सवर त्यांच्या नातेवाइकांचा विवाह सोहळा होता. इंदापूरहून खाजगी ट्रॅव्हल्सने प्रवास करताना प्रखर उन्हाचा फटका चिमुरडीला बसल्याची शक्यता व्यक्त केली जात
आहे.
प्रवासादरम्यान चिमुरडी खेळत होती. मात्र, उष्णतेमुळे ती काहीशी सुस्त झाल्याचे कुटुंबीयांनी सांगितले. लग्नसमारंभाच्या गडबडीत पहाटे चार वाजेच्या सुमारास आई प्रतीक्षा यांना मुलीची हालचाल होत नसल्याचे लक्षात आले. त्यानंतर तिला तातडीने जवळच्या रुग्णालयात दाखल करण्यात आले. मात्र, डॉक्टरांनी तपासणीनंतर तिला मृत घोषित केले. या घटनेनंतर लग्नसमारंभावर शोककळा पसरली. मृत चिमुरडीची आई प्रतीक्षा काटेकर यांची नुकतीच महाराष्ट्र पोलीस दलात निवड झाली होती. मुलगी लहान असल्यामुळे त्यांनी सेवेत रुजू होण्यासाठी मुदत मागितली होती. दरम्यान, सध्या राज्यात तापमानात मोठी वाढ झाली असून, उष्माघातामुळेच चिमुरडीचा मृत्यू झाल्याची प्राथमिक माहिती समोर येत आहे. याप्रकरणी नाशिक रोड पोलीस ठाणे येथे आकस्मिक मृत्यूची नोंद करण्यात आली असून, पुढील तपास
सुरू आहे.

Four-month-old baby dies of heatstroke on Na Road