औंढेवाडी-धोंडबार रस्त्यासाठी 10 कोटींचा निधी मंजूर

उदय सांगळे यांचा दावा; केंद्रीय मंत्री नितीन गडकरी यांच्याकडे पाठपुरावा

सिन्नर : प्रतिनिधी
तीन दशकांपासून रखडलेल्या औंढेवाडी-धोंडबार रस्त्याचा प्रश्न मार्गी लागल्याचा दावा भाजपचे युवा नेते उदय सांगळे यांनी केला आहे. या रस्त्याच्या कामासाठी केंद्रीय मार्ग निधीतून (सीआरएफ) 10 कोटी रुपयांचा निधी मंजूर झाल्याची माहिती त्यांनी बुधवारी (दि.14) पत्रकार परिषदेत दिली. गेल्या दोन महिन्यांपासून रस्त्यासाठी आंदोलन करणार्‍या आदिवासी बांधवांच्या लढ्याला यामुळे यश आल्याचे सांगळे यांनी
स्पष्ट केले.
हरसुले फाटा, सोनांबे, कोनांबे, धोंडबार, औंढेवाडी ते आगासखिंड या मार्गाची अनेक वर्षांपासून दुरवस्था झाली आहे. त्यामुळे या परिसरातील नागरिकांना दळणवळणासाठी मोठ्या अडचणींचा सामना करावा लागत होता. वारंवार मागणी करूनही रस्त्याचा प्रश्न मार्गी लागत नसल्याने संतप्त आदिवासी बांधवांनी आंदोलनाचा मार्ग स्वीकारला होता. रस्त्याच्या मागणीसाठी आंदोलकांनी आमदार माणिकराव कोकाटे आणि खासदार राजाभाऊ वाजे यांच्या संपर्क कार्यालयाबाहेर ठिय्या आंदोलन केले होते. त्यानंतर सिन्नर-घोटी महामार्गावर सुमारे चार तास रास्ता रोको करून प्रशासनाचे लक्ष वेधले. या आंदोलनामुळे रस्त्याचा प्रश्न पुन्हा ऐरणीवर आला होता. दरम्यान, भाजपचे युवा नेते उदय सांगळे यांनी दिल्ली येथे केंद्रीय रस्ते वाहतूक व महामार्गमंत्री नितीन गडकरी यांची भेट घेऊन औंढेवाडी-धोंडबार परिसरातील ग्रामस्थांच्या समस्यांकडे लक्ष वेधल्याचे सांगितले. आमदार गोकुळ गिते, पालकमंत्री गिरीश महाजन आणि सार्वजनिक बांधकाममंत्री शिवेंद्रराजे भोसले यांच्या शिफारशींसह या रस्त्यासाठी निधीची मागणी करण्यात आली होती. या पाठपुराव्यामुळेच रस्त्याच्या कामासाठी 10 कोटी रुपयांचा निधी मंजूर झाल्याचा दावा सांगळे यांनी केला. पत्रकार परिषदेला भाजपचे सजन सांगळे, बहिरू दळवी, सुनील माळी, नगरसेवक अनिल सरवार, नगरसेविका आशा कर्पे, युगंधर वाजे, देवा सांगळे, पंचायत समितीचे माजी सदस्य तातू जगताप, रमेश शिंदे, राहुल साबळे, राहुल खेताडे, सागर शिरसाठ, दत्तू भांगरे, विशाल खेताडे आदींसह औंढेवाडी व धोंडबार येथील ग्रामस्थ उपस्थित होते.

Funds of ₹10 crore sanctioned for the Aundhewadi-Dhondbar road