शिवतेजनगर येथील रो-हाउसमध्ये गॅसगळती : सिलिंडरचा स्फोट

पंचवटी : प्रतिनिधी
पेठरोडवरील मेहेरधाम शिवतेजनगरला बालाजी रो-हाउसमध्ये गॅसगळती होऊन घरगुती सिलिंडरचा स्फोट झाल्याने घरात आग लागून संसारोपयोगी वस्तू जळून खाक झाल्या. ही घटना गुरुवारी (दि.25) सकाळी साडेदहा वाजेच्या सुमारास घडली. घरात कोणी नसल्याने सुदैवाने मोठी जीवितहानी टळली. या घटनेची माहिती मिळताच पंचवटी अग्निशमन दलाच्या जवानांनी घटनास्थळी धाव घेत आग विझवत स्फोट झालेले व दुसरे भरलेले सिलिंडर बाहेर काढल्याने मोठा अनर्थ टळला.
मेहेरधाम परिसरात बालाजी रो-हाउस असून, त्या ठिकाणी सोनाली महाले या राहतात. सकाळी नेहमीप्रमाणे त्या घरातील काम आटोपून कामावर गेल्या असताना सकाळी साडेदहा वाजेच्या सुमाराला अचानकपणे सिलिंडरचा मोठा स्फोट झाला.
काहीतरी फुटल्याचा आवाज झाल्याने शेजारी राहणार्‍या काही नागरिकांनी महाले यांच्या घराकडे धाव घेतली. घरातून धूर निघून आग लागली असल्याचे
निदर्शनास आले.
त्यानंतर काही नागरिकांनी तत्काळ अग्निशमन दलाला माहिती कळविली. घटनेचे गांभीर्य लक्षात घेऊन पंचवटी अग्निशमन दलाचे जवान तसेच नगरसेवक दीपाली गिते यांनी तत्काळ घटनास्थळी धाव घेऊन पाहणी केली. पंचवटी केंद्रावरील अधिकारी संजय कानडे, लिडिंग फायरमन एस. डी. जाधव, लिडिंग फायरमन बी. पी. लहांगे, लिडिंग फायरमन एस. बी. शिलावट, ट्रेनी फायरमन दिनेश चारोस्कर, सिद्धांत गोतीस, मेहुल उगले आदींनी शर्थीचे प्रयत्न करून आग आटोक्यात आणली.

Gas leak in a row house at Shivtejanagar: Cylinder explosion

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.