फिरायला जाताय, एनसीएमसी कार्ड नोंदणी केली का?

आठ लाखांहून अधिक प्रवाशांची आतापर्यंत नोंदणी

नाशिक : प्रतिनिधी
दिवाळी अवघ्या काही दिवसांवर येऊन ठेपली आहे.दिवाळीच्या सुटीत बाहेरगावी जाण्याचे नियोजन केले जाते. महिला व ज्येष्ठ नागरिकांना सवलतीसाठी एनसीएमसी कार्ड सक्तीचे करण्यात आले असले तरी अजूनही अनेक महिलांनी हे कार्डच काढलेले नाही. त्यामुळे त्यांना प्रवासात पूर्ण भाडे भरून प्रवास करावा लागत आहे. राज्य परिवहन महामंडळाच्या एसटीचे राष्ट्रीय समान वाहतूक कार्ड (एनसीएमसी)स्मार्ट कार्ड नोंदणीला जिल्ह्यात प्रवाशांचा प्रतिसाद लाभतो आहे.
दि. 29 पर्यंत नाशिक जिल्ह्यात एकूण 8 लाख 81 हजार 815 प्रवाशांनी स्मार्ट कार्डसाठी नोंदणी पूर्ण केली आहे. यामध्ये महिला सन्मान योजनेतील प्रवाशांचा सर्वाधिक वाटा असून, तब्बल 7 लाख 15 हजार 848 महिला प्रवाशांनी नोंदणी केली असल्याची माहिती एसटी महामंडळाच्या नाशिक विभागाकडून देण्यात आली आहे.
सवलतधारक प्रवाशांचा प्रवास अधिक सुलभ, गतिमान, पारदर्शक करण्यासाठी एसटीने हे स्मार्ट कार्ड सुरू केले आहे. या कार्डमुळे रोख रकमेचा व्यवहार टाळून तिकीट वितरण अधिक सोपे होणार आहे.
दिवाळी लक्ष्मीपूजन 8 नोव्हेंबरला आहे. दिवाळी पाडव्यानंतर भाऊबीज सणासाठी गावाकडे सहकुटुंब जात असतात. त्यामुळे एसटी बसस्थानकांवर मोठी गर्दी होते. वाढत्या गर्दीसाटी जादा बसेसचेही नियोजन एसटी महामंडळाने केले आहे.
गावी, परगावी, देवदर्शनासाठी, सहलीसाठी फिरण्यासाठी नागरिक लालपरीला पसंती देतात. सुरक्षित प्रवासासाठी एसटीतून प्रवास केला जातो. महाराष्ट्र राज्य परिवहन महामंडळाच्या एनसीएमसी स्मार्ट कार्डला प्रवाशांचा
उत्स्फूर्त प्रतिसाद मिळत असल्याचे चित्र आहे. दिवाळीपूर्वी ऐनवेळेची धावपळ टाळण्यासाठी जिल्ह्यातील प्रवाशांनी आपल्या जवळच्या बसस्थानकात, एसटी आगारात किंवा अधिकृत प्रतिनिधीकडे जाऊन नोंदणी करावी, असे आवाहन प्रशासनाने केले आहे.

स्मार्ट कार्ड नोंदणीसाठी प्रतिसाद वाढत असून, सणाच्या पार्श्वभूमीवर ऐनवेळी धावपळ करण्याऐवजी कार्ड अधिकृत प्रतिनिधीकडे जाऊन नोंदणी करावी.
– उमेश बिरारी, विभागीय वाहतूक अधिकारी

प्रवर्गनिहाय आकडेवारी
महिला सन्मान योजना :                         7,15,848
अमृत ज्येष्ठ नागरिक (75 वर्षांवरील) :   78,480
ज्येष्ठ नागरिक :                                     76,202
इतर सवलत प्रवर्ग :                                 11,285
एकूण :                                                    8,81,815

Heading out for a trip? Have you registered your NCMC card?