महामार्गावर देवदूत ठरली आरोग्य सेवा; धावत्या प्रवासात महिलेची सुखरूप प्रसुती
नाशिक प्रतिनिधी
रस्त्यावरची ती पहाट केवळ प्रवासाची नव्हती, तर माणुसकीची परीक्षा होती. धावत्या प्रवासात, महामार्गावरच एका गरोदर महिलेची सुखरूप प्रसुती करत नाशिक जिल्ह्याच्या आरोग्य सेवेने पुन्हा एकदा ‘देवदूत’ ठरण्याचा अनुभव दिला. तत्परता, धैर्य आणि व्यावसायिक कौशल्य यांच्या जोरावर माता–बाळ दोघांचेही प्राण वाचवत सार्वजनिक आरोग्य व्यवस्थेचा संवेदनशील चेहरा या घटनेतून समोर आला.
नाशिक जिल्हा येथे आरोग्य सेवेच्या तत्परतेचा आणि माणुसकीचा प्रत्यय देणारी घटना घडली आहे. मध्यप्रदेशातील एक मजूर कुटुंब पंढरपूरहून आपल्या राज्याकडे परतत असताना, पहाटे चार वाजण्याच्या सुमारास येवला तालुकातील सावरगाव शिवारात त्यांच्या गाडीत असलेल्या गरोदर महिलेला अचानक तीव्र प्रसुती कळा सुरू झाल्या. महामार्गावरच आणीबाणीची स्थिती निर्माण झाल्याने नातेवाईक घाबरले; मात्र स्थानिक नागरिकांनी प्रसंगावधान राखत तातडीने मदत मिळवून दिली.
ग्रामस्थांनी ही माहिती त्वरित सावरगाव प्राथमिक आरोग्य केंद्राचे वैद्यकीय अधिकारी डॉ. अमोल काकड यांना कळवली. घटनेचे गांभीर्य लक्षात घेत डॉ. काकड यांनी क्षणाचाही विलंब न करता परिचारिका दर्शना गवळी आणि रुग्णवाहिका चालक सागर निकम यांना सोबत घेत आवश्यक साहित्यांसह थेट महामार्गावर धाव घेतली.
महिलेची प्रकृती चिंताजनक असल्याने तिला दवाखान्यात हलविणे धोकादायक ठरू शकले असते. त्यामुळे परिस्थितीचा अचूक अंदाज घेत डॉक्टरांनी रस्त्यावरच उपचार सुरू केले. वैद्यकीय टीमच्या कौशल्यपूर्ण हस्तक्षेपामुळे महामार्गावरच यशस्वी प्रसुती झाली आणि माता व नवजात बाळ दोघेही सुरक्षित राहिले.
प्रसुतीनंतर माता व बाळाला पुढील उपचारांसाठी सावरगाव प्राथमिक आरोग्य केंद्रात दाखल करण्यात आले असून सध्या दोघांचीही प्रकृती उत्तम आहे. अचानक उद्भवलेल्या या संकटात मिळालेल्या तत्पर सेवेमुळे मजूर कुटुंबीयांनी भावूक होत आरोग्य कर्मचाऱ्यांचे आभार मानले.
या विशेष कामगिरीबद्दल जिल्हा आरोग्य अधिकारी डॉ. सुधाकर मोरे, अतिरिक्त जिल्हा आरोग्य अधिकारी डॉ. राजेंद्र बागुल, जिल्हा माता-बाल संगोपन अधिकारी डॉ. हर्षल नेहेते, डॉ. दीपक लोणे तसेच तालुका आरोग्य अधिकारी डॉ. तारू यांनी डॉ. अमोल काकड व त्यांच्या संपूर्ण टीमचे विशेष कौतुक व अभिनंदन केले आहे.