उत्तमनगरला रस्त्याच्या कडेला कचर्‍याचे ढीग

महापालिकेचे दुर्लक्ष; सीसीटीव्ही कॅमेरे लावण्याची मागणी

सिडको : विशेष प्रतिनिधी
नाशिक महापालिका आरोग्य विभागाकडून शहर स्वच्छ ठेवण्यासाठी विविध उपाययोजना राबवल्या जात असताना दुसरीकडे काही नागरिकांकडून रस्त्याच्या कडेला कचरा टाकला जात असल्याचे चित्र पाहावयास मिळत आहे. सिडको परिसरातील उत्तमनगर भागात उघड्यावरील कचर्‍याची समस्या गंभीर बनली आहे.
सिडकोतील उत्तमनगर परिसरातील बुद्धविहारालगत दररोज दुचाकी व चारचाकी वाहनातून येणारे काही जण राजरोसपणे कचरा टाकून जात असल्याचे स्थानिक नागरिकांचे म्हणणे आहे. परिणामी त्या ठिकाणी घाणीचे साम्राज्य पसरले असून दुर्गंधीमुळे नागरिकांचे आरोग्य धोक्यात येण्याची भीती व्यक्त केली जात आहे. परिसरातून दररोज शाळकरी मुले, ज्येष्ठ नागरिक आणि महिला ये-जा करीत असतात. मात्र कचर्‍याच्या ढिगार्‍यांमुळे येथील परिस्थिती दिवसेंदिवस बिकट होत चालली आहे.
महापालिका प्रशासनाकडून स्वच्छता मोहिमा, जनजागृती उपक्रम आणि दंडात्मक कारवाईचे नियम अस्तित्वात असतानाही प्रत्यक्षात मात्र अशा प्रकारांना आळा बसत नसल्याचे नागरिकांचे म्हणणे आहे. संबंधितांवर कठोर कारवाई करून याठिकाणी नियमित साफसफाई करण्यात यावी, तसेच सीसीटीव्ही कॅमेरे बसवून कचरा टाकणार्‍यांवर दंडात्मक कारवाई करावी, अशी मागणी स्थानिकांकडून करण्यात आली आहे.

Heaps of garbage on the side of the road in Uttamnagar