नाशिकरोडमध्ये ठाकरे गटाला खिंडार, बबन घोलप हाती घेणार कमळ

नाशिक: प्रतिनिधी

शिर्डी लोकसभा मतदार संघात उमेदवारी न दिल्यामुळे नाराज होत शिंदे गटात प्रवेश केल्यानंतर तेथे मन न रमल्याने पुन्हा ठाकरे गटात आलेले माजी मंत्री बबनराव घोलप यांनी पुन्हा एकदा ठाकरे गटाला धक्का दिला आहे. जनतेची कामे करण्यासाठी आता त्यांनी भारतीय जनता पार्टीत प्रवेश करण्याचा निर्णय घेतला आहे. ठाकरे गटाला हा आणखी एक धक्का मानला जात आहे. मागच्याच आठवड्यात उपनेते सुधाकर बडगुजर यांची हकालपट्टी करण्यात आली होती, ते देखील भाजपच्या वाटेवर असतानाच बबन घोलप यांचीही वाटचाल भाजपकडे आहे. दुसरीकडे शरद पवार गटात असलेले अशोक सातभाई  यांनीही शरद पवार गट सोडण्याचा निर्णय घेतला असून ते देखील भाजपात प्रवेश करणार आहे, बबन घोलप हे माजी मंत्री असून त्यांचा मुंबईत लवकरच प्रवेश सोहळा होणार असल्याने भारतीय जनता पार्टी नाशिक महापालिकेच्यादृष्टीने जोरदारपणे कामाला लागली असून संघटन वाढीसाठी इतर पक्षातील नाराजाना खेचत आहे.