ध्वजारोहणासाठी नाशिकमध्ये वाहतुकीचा ‘महाबंदोबस्त’

उद्या, परवा रामकुंड, पंचवटी परिसरातील प्रमुख रस्ते बंद

♦  गोदाघाट ‘नो व्हेईकल झोन’
♦  वाहनतळांपासून पुढील प्रवास पायी

नाशिक : प्रतिनिधी
सिंहस्थ कुंभमेळा-2027 ची नांदी ठरणार्‍या धर्मध्वज मिरवणूक, ध्वजारोहण सोहळा आणि गोदाआरतीसाठी पोलिसांनी नाशिकच्या वाहतुकीसाठी महाबंदोबस्त नियोजित केला आहे. धर्मध्वज मिरवणुकीनिमित्त शुक्रवारी (दि.30), तर शनिवारी (दि.31) ध्वजारोहण आणि गोदाआरतीमुळे रामकुंड, गोदाघाट व पंचवटी परिसरातील प्रमुख रस्ते बंद राहणार आहेत. राष्ट्रपती, साधू-महंत, अतिमहत्त्वाच्या व्यक्ती आणि भाविकांची उपस्थिती लक्षात घेऊन वाहतूक शाखेचे पोलिस उपायुक्त चंद्रकांत गवळी यांनी विशेष अधिसूचना जारी केली आहे.
शुक्रवारी सकाळी सहापासून मिरवणूक संपेपर्यंत, तर शनिवारी सकाळी सहा ते मध्यरात्रीपर्यंत निर्बंध लागू राहतील. रामतीर्थ व गोदाघाट परिसर ‘नो व्हेईकल झोन’ राहणार असल्याने भाविकांना निर्धारित वाहनतळांवर वाहने उभी करून पुढील प्रवास पायी करावा लागेल. शुक्रवारी तपोवन मैदानातून निघणारी धर्मध्वज मिरवणूक तपोवन क्रॉसिंग, काट्या मारुती चौक, देवी चौक, गणेशवाडी, गाडगे महाराज पूल, दिल्ली दरवाजा, नेहरू चौक, धुमाळ पॉइंट, मेनरोड, रविवार कारंजा आणि अहिल्यादेवी होळकर पुलामार्गे रामतीर्थ येथे पोहोचेल. मिरवणूक मार्गासह अशोक स्तंभ ते रविवार कारंजा, रेडक्रॉस ते धुमाळ पॉइंट, मालेगाव स्टँड ते मखमलाबाद नाका आणि दिंडोरी नाका ते मालेगाव स्टँड या मार्गांवर वाहतुकीला निर्बंध असतील.
ध्वजारोहण आणि गोदाआरतीसाठी शनिवारी पंचवटी व रामकुंड परिसरातील प्रमुख मार्ग बंद राहतील. गाडगे महाराज पूल आणि रामसेतू पुलावरील वाहतूकही बंद असेल. वाहनचालकांनी दिंडोरी नाका, पेठ नाका, मखमलाबाद नाका, गोदा पार्क, गंगापूर नाका, सीबीएस मेहेर सिग्नल, अशोक स्तंभ, जुना गंगापूर नाका, फडोळ चौक, तारवाला सिग्नल, अमृतधाम चौक किंवा पेठ नाका, कृषी उत्पन्न बाजार समिती सिग्नल, तारवाला सिग्नल, अमृतधाम चौक, मिर्ची चौक या पर्यायी मार्गांचा वापर करावा. द्वारकाकडून बळी मंदिराकडे जाणार्‍यांनी उड्डाणपुलाचा वापर करावा, असे निर्देश पोलिसांनी दिले आहेत.

‘Major security and traffic arrangements’ in Nashik for flag-hoisting ceremony