मनमाडला ‘त्या’ अनधिकृत बांधकामाकडे कानाडोळा

तक्रारीनंतरही पालिका अधिकार्‍यांकडून कारवाईऐवजी केवळ आश्वासन

मनमाड : प्रतिनिधी
मनमाड शहरातील भारतरत्न डॉ. ए. पी. जे. अब्दुल कलाम चौक अर्थात, मालेगाव चौफुलीवर असलेल्या मंगल टॉवरमधील व्यावसायिकांनी बांधकाम परवानगीचे उल्लंघन करून मोठ्या प्रमाणात विनापरवाना अतिक्रमण केल्याचे समोर आले आहे.
अतिक्रमणधारक व्यावसायिक इतर नागरिकांना दादागिरी करतात. येथे गाडी लावू नका, पार्किंग आहे का, असे विविध प्रकारचे प्रश्न उपस्थित करून नाहक त्रास देण्याचे काम करतात. धक्कादायक बाब म्हणजे, या गंभीर प्रकरणाबाबत पालिकेच्या नगररचना विभागाकडे लेखी तक्रार करूनही संबंधित विभागाचे अधिकारी विलास हुकिरे केवळ कारवाई करू, आता प्रश्न जनरल बोर्डावर घेतला आहे, असे तोंडी आश्वासन देऊन वेळ मारून नेत आहेत. सत्ताधारी गटाचे नगरसेवक व इतर लोकप्रतिनिधीदेखील अतिक्रमणाला साथ देत आहेत. त्यामुळे पालिकेचे अधिकारीच या अतिक्रमणाला पाठीशी घालत आहेत का, असा प्रश्न नागरिकांमधून विचारला जात आहे. याबाबत लेखी तक्रार देऊन व पाठपुरावा करूनदेखील कारवाई होत नाही. याशिवाय पोलीस निरीक्षक विजय करे यांनीदेखील अतिक्रमणाबाबत रीतसर लेखी अहवाल सादर केलेला आहे. मात्र, यालाही केराची टोपली दाखवण्यात आली आहे. जर अतिक्रमणधारकांना पाठीशी घालण्यात येत असेल, तर सर्वसामान्य जनतेने न्याय मागावा कुणाकडे, असा सवाल उपस्थित केला जात आहे. येत्या दोन दिवसांत कारवाई झाली नाही, तर जिल्हाधिकारी कार्यालयात व सबंधित मंत्र्यांकडे याबाबत रीतसर तक्रार करून कारवाई करण्याची मागणी करणार असल्याचे तक्रारदारांंनी सांगितले आहे.

अधिकार्‍यांची मिलिभगत

शासकीय नियमांचे उल्लंघन होत असताना पालिका प्रशासन गप्प का, असा सवाल आता उपस्थित होत आहे. शहरात एकीकडे किरकोळ अतिक्रमणांवर हातोडा चालवला जातो, तर दुसरीकडे अशा मोठ्या व्यावसायिकांच्या अनधिकृत बांधकामांना अभय का दिले जाते? यावरून नगररचना विभाग आणि अतिक्रमणधारकांमध्ये ’अर्थ’पूर्ण संबंध असल्याची चर्चा आता शहरात रंगू लागली आहे. या अनधिकृत बांधकामावर त्वरित कारवाई न झाल्यास येत्या काळात तीव्र आंदोलनाचा इशारादेखील संतप्त नागरिकांनी दिला आहे.

अतिक्रमणाबाबत उदासीनता

नगररचना विभागाने या तक्रारीची दखल घेऊन प्रत्यक्ष पाहणी करणे आणि अनधिकृत भाग हटवणे अपेक्षित होते. मात्र, अनेक दिवस उलटूनही पालिकेच्या वतीने ठोस कारवाई करण्यात आलेली नाही. तक्रारदारांनी पाठपुरावा केला असता, संबंधित अधिकारी विलास हुकिरे केवळ आश्वासने देण्यात धन्यता मानत आहेत. या संपूर्ण प्रकरणात मुख्याधिकारीदेखील बघ्याची भूमिका घेत असल्याने संताप व्यक्त केला जात आहे.

Manmad turns a blind eye to ‘that’ unauthorized construction

Sheetal Nagpure

शीतल नागपुरे या गांवकरी मध्ये डिजिटल विभागात कार्यरत असून, १ वर्षापासून ऑनलाइन वृत्त संकलनाचे काम करत आहेत. त्या पदवीधर असून, त्यांना वाचनाची आवड आहे.